na bhulna mujhe dil se meri KHabar lena

na bhūlnā mujhe dil se mirī ḳhabar lenā

jo yaad aa.uuñ kabhī maiñ to yaad kar lenā

hue haiñ ḳhabt meñ kyā mubtalā tire āshiq

zarūr kyā hai ki dil de ke dard-e-sar lenā

vo sab se kahne lage taak kar mire dil ko

kisī tarah bhī hai lenā ise magar lenā

shab-e-visāl kī vo sharm yaad aatī hai

hayā se muñh pe dupaTTe ko apne dhar lenā

unheñ manā ke ḳhushāmad se iltijāoñ se

kisī tarah se javāb ai payāmbar lenā

vo aa ke leTe jo pahlū meñ mere vasl kī shab

kahā ye dil ne mire ḳhvāb raat bhar lenā

hamāre dil ke ḳharīdār aur bhī haiñ bahut

na der kījiye manzūr hai agar lenā

jise vo chāheñ baḌhā.eñ jise vo chāheñ ghaTā.eñ

ye un kā khel hai dushman ko dost kar lenā

dikhā dikhā ke na tum aur mujh ko tarsāo

maiñ mar gayā to mire baad ban sañvar lenā

milā ke ḳhaak meñ dil ko vo mere kahte haiñ

ye jis qadar huā nuqsān ham se bhar lenā

jo tum meñ hai ye kamāl aur ko nasīb kahāñ

dikhā ke jalva har ik ko ġhulām kar lenā

huā jo qat-e-ta.alluq to kyā ġharaz us se

na aap 'ranj' kā ab naam umr bhar lenā

na bhulna mujhe dil se meri KHabar lena

jo yaad aaun kabhi main to yaad kar lena

hue hain KHabt mein kya mubtala tere aashiq

zarur kya hai ki dil de ke dard-e-sar lena

wo sab se kahne lage tak kar mere dil ko

kisi tarah bhi hai lena ise magar lena

shab-e-visal ki wo sharm yaad aati hai

haya se munh pe dupaTTe ko apne dhar lena

unhen mana ke KHushamad se iltijaon se

kisi tarah se jawab ai payambar lena

wo aa ke leTe jo pahlu mein mere wasl ki shab

kaha ye dil ne mere KHwab raat bhar lena

hamare dil ke KHaridar aur bhi hain bahut

na der kijiye manzur hai agar lena

jise wo chahen baDhaen jise wo chahen ghaTaen

ye un ka khel hai dushman ko dost kar lena

dikha dikha ke na tum aur mujh ko tarsao

main mar gaya to mere baad ban sanwar lena

mila ke KHak mein dil ko wo mere kahte hain

ye jis qadar hua nuqsan hum se bhar lena

jo tum mein hai ye kamal aur ko nasib kahan

dikha ke jalwa har ek ko ghulam kar lena

hua jo qat-e-talluq to kya gharaz us se

na aap 'ranj' ka ab nam umr bhar lena