na bim-e-gham hai ne shadi ki hum ummid karte hain

na bīm-e-ġham hai ne shādī kī ham ummīd karte haiñ

qalandar haiñ jo pesh aa jaa.e sab kuchh diid karte haiñ

kahāñ kā ġharra-e-shavvāl kaisā ashra zī-hijja

hameñ haath aa.e mai jis din ham us din iid karte haiñ

mizāj-e-ḳhas hai ahl-e-ishq kā jalne ke aalam meñ

jalātā hai jo in ko us kī ye tā.īd karte haiñ

irāda to na thā apnā bhī jaane kā tire ghar se

pa kyā kiije ki baḳht-e-vāzhgūñ tākīd karte haiñ

ye kaasa sar tale rakkhe jo mai-ḳhānoñ meñ sote haiñ

jise chāheñ use ik jaam meñ jamshed karte haiñ

jinheñ kuchh silsile meñ ishq ke tahqīq hāsil hai

vo kab majnūñ se har gumrāh kī taqlīd karte haiñ

na jaane kahiye kis qālib meñ 'qā.em' dard-e-dil us se

nahīñ bantī zabāñ se dil meñ jo tamhīd karte haiñ

na bim-e-gham hai ne shadi ki hum ummid karte hain

qalandar hain jo pesh aa jae sab kuchh did karte hain

kahan ka gharra-e-shawwal kaisa ashra zi-hijja

hamein hath aae mai jis din hum us din id karte hain

mizaj-e-KHas hai ahl-e-ishq ka jalne ke aalam mein

jalata hai jo in ko us ki ye taid karte hain

irada to na tha apna bhi jaane ka tere ghar se

pa kya kije ki baKHt-e-wazhgun takid karte hain

ye kasa sar tale rakkhe jo mai-KHanon mein sote hain

jise chahen use ek jam mein jamshed karte hain

jinhen kuchh silsile mein ishq ke tahqiq hasil hai

wo kab majnun se har gumrah ki taqlid karte hain

na jaane kahiye kis qalib mein 'qaem' dard-e-dil us se

nahin banti zaban se dil mein jo tamhid karte hain