na dam baqi hai aankhon mein na dil mein jaan baqi hai

na dam baaqī hai āñkhoñ meñ na dil meñ jaan baaqī hai

magar donoñ meñ terī diid kā armān baaqī hai

huī hāsil subukdoshī na qātil sar kaTāne se

ki gardan par mirī shamshīr kā ehsān baaqī hai

na ruk jaanā uḌā kar dhajjiyāñ mere garebāñ kī

abhī dast-e-junūñ us shoḳh kā dāmān baaqī hai

dhuāñ bhī qabr se uTThā to bal khātā huā uTThā

tirī ḳhamdār zulfoñ kā jo ab tak dhyān baaqī hai

tumhāre rū-e-raushan se hai bazm-e-husn kī raunaq

mire dam se jahāñ meñ āshiqī kī shaan baaqī hai

dam-e-murdan vo aaya bhī to aaya saath ġhairoñ ke

sitamgar ke karam meñ bhī sitam kī shaan baaqī hai

piye tasbīh par gin gin ke sāġhar aaj vaa.iz ne

ba-vaqt-e-mai-kashī bhī zohd kī ik shaan baaqī hai

jo kaaTā tū ne merā sar girā tere hī qadmoñ par

tire shaidā meñ mar kar bhī vafā kī shaan baaqī hai

tamanna aarzū armān sab to ho chuke ruḳhsat

dil-e-vīrāñ meñ bas ik yaas ab mehmān baaqī hai

merā sar kaaT kar bolā vo bismil dekh kar mujh ko

taḌapte kyoñ ho kyā kuchh aur bhī armān baaqī hai

ugī nargis jo turbat par to kis shoḳhī se vo bole

abhī tak ghūrne kā aap ko armān baaqī hai

abas tum rauñdte ho merī turbat ḳhaak hone par

ab is meñ ustuḳhvāñ tak bhī nahīñ ai jaan baaqī hai

falak par ruuh gar pahūñchī to tan zer-e-zamīñ pahūñchā

talāsh-e-yār kā ab kaun sā unvān baaqī hai

na dam baqi hai aankhon mein na dil mein jaan baqi hai

magar donon mein teri did ka arman baqi hai

hui hasil subukdoshi na qatil sar kaTane se

ki gardan par meri shamshir ka ehsan baqi hai

na ruk jaana uDa kar dhajjiyan mere gareban ki

abhi dast-e-junun us shoKH ka daman baqi hai

dhuan bhi qabr se uTTha to bal khata hua uTTha

teri KHamdar zulfon ka jo ab tak dhyan baqi hai

tumhaare ru-e-raushan se hai bazm-e-husn ki raunaq

mere dam se jahan mein aashiqi ki shan baqi hai

dam-e-murdan wo aaya bhi to aaya sath ghairon ke

sitamgar ke karam mein bhi sitam ki shan baqi hai

piye tasbih par gin gin ke saghar aaj waiz ne

ba-waqt-e-mai-kashi bhi zohd ki ek shan baqi hai

jo kaTa tu ne mera sar gira tere hi qadmon par

tere shaida mein mar kar bhi wafa ki shan baqi hai

tamanna aarzu arman sab to ho chuke ruKHsat

dil-e-viran mein bas ek yas ab mehman baqi hai

mera sar kaT kar bola wo bismil dekh kar mujh ko

taDapte kyon ho kya kuchh aur bhi arman baqi hai

ugi nargis jo turbat par to kis shoKHi se wo bole

abhi tak ghurne ka aap ko arman baqi hai

abas tum raundte ho meri turbat KHak hone par

ab is mein ustuKHwan tak bhi nahin ai jaan baqi hai

falak par ruh gar pahunchi to tan zer-e-zamin pahuncha

talash-e-yar ka ab kaun sa unwan baqi hai