na dasht mein na chaman mein na ghar mein rakkha tha

na dasht meñ na chaman meñ na ghar meñ rakkhā thā

mirā sukūn tirī rahguzar meñ rakkhā thā

vo terī yaad thī kyā thā jo ek nashtar sā

tamām umr jo mere jigar meñ rakkhā thā

gayā vo daur-e-junūñ dil pe jis kā qabza thā

nikal chukā hai vo saudā jo sar meñ rakkhā thā

vafā ke naam pe ham ne fareb khāyā hai

ḳhazaf chhupā ke kisī ne guhar meñ rakkhā thā

bujhā diyā hai zamāne kī āñdhiyoñ ne use

jo ik charāġh tirī rahguzar meñ rakkhā thā

bachā ke sab kī nazar se nazar meñ rakkhā thā

tumhīñ ko dil meñ tumhīñ ko jigar meñ rakkhā thā

nigāh-e-ilm khulī dil kī aañkh band huī

añdherā be-ḳhabarī kā ḳhabar meñ rakkhā thā

bujhī vo sham-e-mohabbat jo dil kī raunaq thī

nikal gayā vo asāsa jo ghar meñ rakkhā thā

zamāna ho gayā kis tarah bā-ḳhabar us se

jo raaz maiñ ne dil-e-mo'tabar meñ rakkhā thā

tumhāre aate hī lo aaj vo bhī ḳhatm huā

jo fāsla mirī shām-o-sahar meñ rakkhā thā

mire qalam ne ye 'rizvān' charāġh-e-sher-o-suḳhan

jalā ke mahfil-e-ilm-o-hunar meñ rakkhā thā

na dasht mein na chaman mein na ghar mein rakkha tha

mera sukun teri rahguzar mein rakkha tha

wo teri yaad thi kya tha jo ek nashtar sa

tamam umr jo mere jigar mein rakkha tha

gaya wo daur-e-junun dil pe jis ka qabza tha

nikal chuka hai wo sauda jo sar mein rakkha tha

wafa ke nam pe hum ne fareb khaya hai

KHazaf chhupa ke kisi ne guhar mein rakkha tha

bujha diya hai zamane ki aandhiyon ne use

jo ek charagh teri rahguzar mein rakkha tha

bacha ke sab ki nazar se nazar mein rakkha tha

tumhin ko dil mein tumhin ko jigar mein rakkha tha

nigah-e-ilm khuli dil ki aankh band hui

andhera be-KHabari ka KHabar mein rakkha tha

bujhi wo sham-e-mohabbat jo dil ki raunaq thi

nikal gaya wo asasa jo ghar mein rakkha tha

zamana ho gaya kis tarah ba-KHabar us se

jo raaz main ne dil-e-mo'tabar mein rakkha tha

tumhaare aate hi lo aaj wo bhi KHatm hua

jo fasla meri sham-o-sahar mein rakkha tha

mere qalam ne ye 'rizwan' charagh-e-sher-o-suKHan

jala ke mahfil-e-ilm-o-hunar mein rakkha tha