na de jo dil hi duhai to koi baat nahin

na de jo dil hī duhā.ī to koī baat nahīñ

ye chaar din kī ḳhudā.ī to koī baat nahīñ

jo māñgnā hai tujhe sirf ek dar se maañg

ye dar-ba-dar kī gadā.ī to koī baat nahīñ

agarche ḳhvāhish-e-manzil junūñ ke nāḳhun le

ḳhirad kī uqda-kushā.ī to koī baat nahīñ

maza to jab hai bujhe tishnagī-e-ḳhār-e-alam

junūn-e-ābla-pā.ī to koī baat nahīñ

ḳhud apne dil ko banā le tū āstān-e-vafā

haram kī nāsiya-sā.ī to koī baat nahīñ

nikal ga.ī thī mire muñh se dil kī baat jo kal

huī hai aaj parā.ī to koī baat nahīñ

mai-e-suḳhan se na pighle jo ābgīna-e-dil

to 'faḳhr' sho.ala-navā.ī to koī baat nahīñ

na de jo dil hi duhai to koi baat nahin

ye chaar din ki KHudai to koi baat nahin

jo mangna hai tujhe sirf ek dar se mang

ye dar-ba-dar ki gadai to koi baat nahin

agarche KHwahish-e-manzil junun ke naKHun le

KHirad ki uqda-kushai to koi baat nahin

maza to jab hai bujhe tishnagi-e-KHar-e-alam

junun-e-abla-pai to koi baat nahin

KHud apne dil ko bana le tu aastan-e-wafa

haram ki nasiya-sai to koi baat nahin

nikal gai thi mere munh se dil ki baat jo kal

hui hai aaj parai to koi baat nahin

mai-e-suKHan se na pighle jo aabgina-e-dil

to 'faKHr' shoala-nawai to koi baat nahin