na de tabib dawa dard mein kami ke liye

na de tabīb davā dard meñ kamī ke liye

ki dil kā rog zarūrī hai zindagī ke liye

rah-e-hayāt meñ Thokar na ab lagegī tumheñ

ki zaḳhm-e-dil haiñ mire sab kī raushnī ke liye

thī us ke jism pe bosīda be-kasī kī ridā

magar vo maañg rahā thā duā sabhī ke liye

maiñ māntā huuñ ki niklā hai sach kī khoj meñ vo

magar ye kaam nahīñ sahl har kisī ke liye

mirī zabān pe kab tak lagā.egā pahra

zamīr bech rahā hai jo bartarī ke liye

talāsh kartā hai dariyā tū reg-zāroñ meñ

ye ḳhud-kushī kā hai andāz tishnagī ke liye

lagāte ḳhuub ho misrā magar 'alīm' suno

aruuz jānñā lāzim hai shā.irī ke liye

na de tabib dawa dard mein kami ke liye

ki dil ka rog zaruri hai zindagi ke liye

rah-e-hayat mein Thokar na ab lagegi tumhein

ki zaKHm-e-dil hain mere sab ki raushni ke liye

thi us ke jism pe bosida be-kasi ki rida

magar wo mang raha tha dua sabhi ke liye

main manta hun ki nikla hai sach ki khoj mein wo

magar ye kaam nahin sahl har kisi ke liye

meri zaban pe kab tak lagaega pahra

zamir bech raha hai jo bartari ke liye

talash karta hai dariya tu reg-zaron mein

ye KHud-kushi ka hai andaz tishnagi ke liye

lagate KHub ho misra magar 'alim' suno

aruz jaanna lazim hai shairi ke liye