na dekha jama-e-KHud-raftagi utar ke bhi

na dekhā jāma-e-ḳhud-raftagī utaar ke bhī

chalī ga.iiñ tirī yādeñ mujhe pukār ke bhī

ye zindagī hai use talḳh tursh honā hai

sa.ūbatoñ ke zarā dekh din guzār ke bhī

habāb-e-zīst na dast-e-qazā se TuuT sakā

hayāt baaqī rahī qabr meñ utaar ke bhī

tire ġhurūr ke hai rū-ba-rū ye ḳhush-shikanī

jhukā ke sar na hue pesh shahryār ke bhī

badī na rokeñ pe nafrat to kar hī lete haiñ

muzāhire haiñ ye kuchh apne iḳhtiyār ke bhī

kabhī gale bhī milo aa ke shāḳh-e-gul kī tarah

adā to kar diye haq ham ne intizār ke bhī

qubūl o rad ke sabhī iḳhtiyār us ke the

magar maiñ ḳhush thā tamannā ko us pe vaar ke bhī

bahār ho to lahū meñ utartī hai 'shāhid'

hameñ to chhū ke na guzre ye din bahār ke bhī

na dekha jama-e-KHud-raftagi utar ke bhi

chali gain teri yaaden mujhe pukar ke bhi

ye zindagi hai use talKH tursh hona hai

saubaton ke zara dekh din guzar ke bhi

habab-e-zist na dast-e-qaza se TuT saka

hayat baqi rahi qabr mein utar ke bhi

tere ghurur ke hai ru-ba-ru ye KHush-shikani

jhuka ke sar na hue pesh shahryar ke bhi

badi na roken pe nafrat to kar hi lete hain

muzahire hain ye kuchh apne iKHtiyar ke bhi

kabhi gale bhi milo aa ke shaKH-e-gul ki tarah

ada to kar diye haq hum ne intizar ke bhi

qubul o rad ke sabhi iKHtiyar us ke the

magar main KHush tha tamanna ko us pe war ke bhi

bahaar ho to lahu mein utarti hai 'shahid'

hamein to chhu ke na guzre ye din bahaar ke bhi