na dekhna tha jo paiham dikhai deta hai

na dekhnā thā jo paiham dikhā.ī detā hai

ajiib ḳhauf kā aalam dikhā.ī detā hai

ḳharābī terī nazar meñ nahīñ hai dil meñ hai

isī liye to tujhe kam dikhā.ī detā hai

ye ab jo bād-e-sabā bhī sumūm jaisī hai

falak zamīn se barham dikhā.ī detā hai

patangeñ uḌne lagī haiñ chhatoñ pe chāroñ taraf

bahār aane kā mausam dikhā.ī detā hai

sabhī kī aañkh nahīñ hotī dekhne vaalī

kisī kisī ko mirā ġham dikhā.ī detā hai

guzar gayā hai chaman se abhī abhī 'sayyad'

ki barg-o-bār pe kuchh nam dikhā.ī detā hai

na dekhna tha jo paiham dikhai deta hai

ajib KHauf ka aalam dikhai deta hai

KHarabi teri nazar mein nahin hai dil mein hai

isi liye to tujhe kam dikhai deta hai

ye ab jo baad-e-saba bhi sumum jaisi hai

falak zamin se barham dikhai deta hai

patangen uDne lagi hain chhaton pe chaaron taraf

bahaar aane ka mausam dikhai deta hai

sabhi ki aankh nahin hoti dekhne wali

kisi kisi ko mera gham dikhai deta hai

guzar gaya hai chaman se abhi abhi 'sayyad'

ki barg-o-bar pe kuchh nam dikhai deta hai