na din bujhe hain na bazm-e-shabana Khaali hai

na din bujhe haiñ na bazm-e-shabāna ḳhālī hai

nahīñ hai dil kā magar kuchh Thikāna ḳhālī hai

qafas meñ phir chale aa.e palaT ke ahl-e-qafas

kahīñ chaman meñ nahīñ āb-o-dāna ḳhālī hai

'ajab dayār hai ye jis meñ tājdāroñ ke

jaḌe haiñ taaj meñ hiire ḳhazāna ḳhālī hai

gul-o-samar se tahī haath shāḳh-sāroñ ke

sitāroñ se falak-e-be-karāna ḳhālī hai

ab aa.e ho ki nahīñ dil meñ aarzū koī

parinde uḌ chuke haiñ āshiyāna ḳhālī hai

kabhī mile tumheñ fursat to dekh lo ham ko

bas ek ham hī bache haiñ zamāna ḳhālī hai

diloñ meñ dard zabāñ meñ halāvateñ na rahīñ

so masnad-e-ġhazal-e-āshiqāna ḳhālī hai

na din bujhe hain na bazm-e-shabana KHali hai

nahin hai dil ka magar kuchh Thikana KHali hai

qafas mein phir chale aae palaT ke ahl-e-qafas

kahin chaman mein nahin aab-o-dana KHali hai

'ajab dayar hai ye jis mein tajdaron ke

jaDe hain taj mein hire KHazana KHali hai

gul-o-samar se tahi hath shaKH-saron ke

sitaron se falak-e-be-karana KHali hai

ab aae ho ki nahin dil mein aarzu koi

parinde uD chuke hain aashiyana KHali hai

kabhi mile tumhein fursat to dekh lo hum ko

bas ek hum hi bache hain zamana KHali hai

dilon mein dard zaban mein halawaten na rahin

so masnad-e-ghazal-e-ashiqana KHali hai