na ehtijaj na aawargi mein dekh mujhe

na ehtijāj na āvārgī meñ dekh mujhe

jo ho sake to mirī raushnī meñ dekh mujhe

gul-e-havas bhī hai shāḳh-e-visāl kā hissa

charāġh-e-lāla kī taaza kalī meñ dekh mujhe

vazāhatoñ se tū kuchh bhī samajh na pā.egā

kabhī ġhubār kabhī tīrgī meñ dekh mujhe

fazā-e-yād meñ tabdīliyāñ nahīñ hotīñ

jadīd shaḳhs purānī galī meñ dekh mujhe

sitāra taab zamāne kī yādgār huuñ maiñ

kisī malāl na sharmindagī meñ dekh mujhe

maiñ ek buuñd sar-e-nok-e-ḳhār-e-sahrā huuñ

tulū-e-sub.h-e-dam-e-āḳhirī meñ dekh mujhe

mire bayān ke jāh-o-jalāl par mat jā

mire ḳhayāl kī pas-māndagī meñ dekh mujhe

na ehtijaj na aawargi mein dekh mujhe

jo ho sake to meri raushni mein dekh mujhe

gul-e-hawas bhi hai shaKH-e-visal ka hissa

charagh-e-lala ki taza kali mein dekh mujhe

wazahaton se tu kuchh bhi samajh na paega

kabhi ghubar kabhi tirgi mein dekh mujhe

faza-e-yaad mein tabdiliyan nahin hotin

jadid shaKHs purani gali mein dekh mujhe

sitara tab zamane ki yaadgar hun main

kisi malal na sharmindagi mein dekh mujhe

main ek bund sar-e-nok-e-KHar-e-sahra hun

tulu-e-subh-e-dam-e-aKHiri mein dekh mujhe

mere bayan ke jah-o-jalal par mat ja

mere KHayal ki pas-mandagi mein dekh mujhe