na fasle ko na raKHt-e-safar ko dekhte hain

na fāsle ko na raḳht-e-safar ko dekhte haiñ

ajiib rañj se dīvār-o-dar ko dekhte haiñ

na jaane kis ke bichhaḌne kā ḳhauf hai un ko

jo roz ghar se nikal kar shajar ko dekhte haiñ

ye roz-o-shab haiñ ibārat usī tavāzun se

kabhī hunar ko kabhī apne ghar ko dekhte haiñ

tū is qadar bhī tavajjoh pe ḳhush-gumān na ho

tujhe nahīñ tirī tāb-e-nazar ko dekhte haiñ

firāq ham ko mayassar bhī hai pasand bhī hai

pe kyā kareñ ki tirī chashm-e-tar ko dekhte haiñ

ham ahl-e-hirs-o-havas tujh se be-niyāz kahāñ

duā ke ba.ad duā ke asar ko dekhte haiñ

ye be-sabab nahīñ saudā ḳhalā-navardī kā

musāfirān-e-adam rahguzar ko dekhte haiñ

vo jis taraf ho nazar us taraf nahīñ uThtī

vo jā chuke to musalsal udhar ko dekhte haiñ

hameñ bhī apnā muqallid shumār kar 'ġhālib'

ki ham bhī rashk se tere hunar ko dekhte haiñ

na fasle ko na raKHt-e-safar ko dekhte hain

ajib ranj se diwar-o-dar ko dekhte hain

na jaane kis ke bichhaDne ka KHauf hai un ko

jo roz ghar se nikal kar shajar ko dekhte hain

ye roz-o-shab hain ibarat usi tawazun se

kabhi hunar ko kabhi apne ghar ko dekhte hain

tu is qadar bhi tawajjoh pe KHush-guman na ho

tujhe nahin teri tab-e-nazar ko dekhte hain

firaq hum ko mayassar bhi hai pasand bhi hai

pe kya karen ki teri chashm-e-tar ko dekhte hain

hum ahl-e-hirs-o-hawas tujh se be-niyaz kahan

dua ke baad dua ke asar ko dekhte hain

ye be-sabab nahin sauda KHala-nawardi ka

musafiran-e-adam rahguzar ko dekhte hain

wo jis taraf ho nazar us taraf nahin uThti

wo ja chuke to musalsal udhar ko dekhte hain

hamein bhi apna muqallid shumar kar 'ghaalib'

ki hum bhi rashk se tere hunar ko dekhte hain