na faza-e-ishq mein kaif hai na wo husn-e-jalwa-e-yar hai

na fazā-e-ishq meñ kaif hai na vo husn-e-jalva-e-yār hai

na tajalliyoñ meñ mazā rahā na vo zor-e-barq-o-sharār hai

na ghaTā uThī na havā chalī na ḳhalish miTī na kalī khilī

ye fareb-e-jalva-e-zauq hai ye tilism-e-shauq-e-bahār hai

kabhī ashk bā.is-e-ranj-o-ġham kabhī aah maujib-e-sad-alam

na ye ashk vaj.h-e-sukūn-e-dil na ye aah vaj.h-e-qarār hai

jo asīr-e-ranj-o-alam nahīñ jo fidā-e-ulfat-o-ġham nahīñ

na vo qadr-dān-e-jamāl-e-gul na vo āshnā-e-bahār hai

jo karam huā to sitam nahīñ jo sitam huā to karam nahīñ

ye ajiib maslak-e-husn hai ye ajab adā kā shi.ār hai

na to rut phirī na kañval khilā na vo daur-e-sāġhar-e-mai chalā

yahī kah ke baaġh se vo uThā jo adā-shanās-e-bahār hai

vahī ranj-o-ġham haiñ mujhe 'vafā' vahī soz bhī vahī saaz bhī

na sukūn hai na sukūt hai na shakeb hai na qarār hai

na faza-e-ishq mein kaif hai na wo husn-e-jalwa-e-yar hai

na tajalliyon mein maza raha na wo zor-e-barq-o-sharar hai

na ghaTa uThi na hawa chali na KHalish miTi na kali khili

ye fareb-e-jalwa-e-zauq hai ye tilism-e-shauq-e-bahaar hai

kabhi ashk bais-e-ranj-o-gham kabhi aah maujib-e-sad-alam

na ye ashk wajh-e-sukun-e-dil na ye aah wajh-e-qarar hai

jo asir-e-ranj-o-alam nahin jo fida-e-ulfat-o-gham nahin

na wo qadr-dan-e-jamal-e-gul na wo aashna-e-bahaar hai

jo karam hua to sitam nahin jo sitam hua to karam nahin

ye ajib maslak-e-husn hai ye ajab ada ka shiar hai

na to rut phiri na kanwal khila na wo daur-e-saghar-e-mai chala

yahi kah ke bagh se wo uTha jo ada-shanas-e-bahaar hai

wahi ranj-o-gham hain mujhe 'wafa' wahi soz bhi wahi saz bhi

na sukun hai na sukut hai na shakeb hai na qarar hai