na fikr karna hamare dil ki na us junun ka malal rakhna

na fikr karnā hamāre dil kī na us junūñ kā malāl rakhnā

ye iltijā hai hamārī tum se tum apne dil ko sambhāl rakhnā

vo shām-e-ġham jo guzārī ham ne koī guzāre to jaan paa.e

kaThin hai kitnā hai kaisā mushkil uThā ke maazī meñ haal rakhnā

koī sahīfa samajh ke rakkhā tumhāre ḳhat ko chhupā ke dil meñ

mirī mohabbat ko apne dil meñ hamesha tum lā-zavāl rakhnā

tumhī ko chāhā tumhī ko puujā tumhī ko dil meñ sajā ke rakkhā

yahī hai sheva yahī vatīra nazar meñ terā jamāl rakhnā

ujālā karte tumhāre ghar meñ jo bas meñ hotā 'ġhazal' hamāre

duā hamārī hai umr saarī ḳhudī ko tum bā-kamāl rakhnā

na fikr karna hamare dil ki na us junun ka malal rakhna

ye iltija hai hamari tum se tum apne dil ko sambhaal rakhna

wo sham-e-gham jo guzari hum ne koi guzare to jaan pae

kaThin hai kitna hai kaisa mushkil uTha ke mazi mein haal rakhna

koi sahifa samajh ke rakkha tumhaare KHat ko chhupa ke dil mein

meri mohabbat ko apne dil mein hamesha tum la-zawal rakhna

tumhi ko chaha tumhi ko puja tumhi ko dil mein saja ke rakkha

yahi hai shewa yahi watira nazar mein tera jamal rakhna

ujala karte tumhaare ghar mein jo bas mein hota 'ghazal' hamare

dua hamari hai umr sari KHudi ko tum ba-kamal rakhna