na furqat ne luTa na aahon ne mara

na furqat ne luuTā na aahoñ ne maarā

mohabbat bhare ishtibāhoñ ne maarā

mire dil ko un kī nigāhoñ ne maarā

inhīñ do mohabbat-panāhoñ ne maarā

mohabbat kī in sair-gāhoñ ne maarā

tirī multafit sī nigāhoñ ne maarā

tumhārī nigāhoñ kī be-shak ḳhatā kyā

mujhe ḳhud hī merī nigāhoñ ne maarā

pareshāñ pareshāñ vo ma.asūm nazreñ

ġham-e-ishq ke dād-ḳhvāhoñ ne maarā

duhā.ī hai ai manzil-e-husn-e-jānāñ

mohabbat kī sunsān rāhoñ ne maarā

na dekho mohabbat se ā.īna dekho

ki aisī hī mujh ko nigāhoñ ne maarā

vo kyā qadr-o-qīmat tire ġham kī jāneñ

jinheñ ziist kī aam rāhoñ ne maarā

mirī ehtiyāt-e-junūñ haa.e 'bāsit'

na manzil ne luuTā na rāhoñ ne maarā

na furqat ne luTa na aahon ne mara

mohabbat bhare ishtibahon ne mara

mere dil ko un ki nigahon ne mara

inhin do mohabbat-panahon ne mara

mohabbat ki in sair-gahon ne mara

teri multafit si nigahon ne mara

tumhaari nigahon ki be-shak KHata kya

mujhe KHud hi meri nigahon ne mara

pareshan pareshan wo masum nazren

gham-e-ishq ke dad-KHwahon ne mara

duhai hai ai manzil-e-husn-e-jaanan

mohabbat ki sunsan rahon ne mara

na dekho mohabbat se aaina dekho

ki aisi hi mujh ko nigahon ne mara

wo kya qadr-o-qimat tere gham ki jaanen

jinhen zist ki aam rahon ne mara

meri ehtiyat-e-junun hae 'basit'

na manzil ne luTa na rahon ne mara