na ghar mein chain na bahar sukun kahan jaen

na ghar meñ chain na bāhar sukūñ kahāñ jaa.eñ

ham ahl-e-dard ham ahl-e-junūñ kahāñ jaa.eñ

zamīn-e-dasht balā āsmāñ sarāb-āsā

bikhar bhī jaa.eñ jo mānind-e-ḳhūñ kahāñ jaa.eñ

musāfiroñ ko huī shaam dasht-e-ġhurbat meñ

siyah huā falak-e-nīlgūñ kahāñ jaa.eñ

us anjuman sī huī ab to bazm-e-yārāñ bhī

ham aise log bahāl-e-zubūñ kahāñ jaa.eñ

ye pattharoñ kā nagar dasht-e-shab meñ hai mahsūr

chaleñ bhī le ke jo qindīl-e-ḳhūñ kahāñ jaa.eñ

kahāñ zamīn se miltā hai āsmān 'salām'

nazar-fareb ufuq ke fusūñ kahāñ jaa.eñ

na ghar mein chain na bahar sukun kahan jaen

hum ahl-e-dard hum ahl-e-junun kahan jaen

zamin-e-dasht bala aasman sarab-asa

bikhar bhi jaen jo manind-e-KHun kahan jaen

musafiron ko hui sham dasht-e-ghurbat mein

siyah hua falak-e-nilgun kahan jaen

us anjuman si hui ab to bazm-e-yaran bhi

hum aise log bahaal-e-zubun kahan jaen

ye pattharon ka nagar dasht-e-shab mein hai mahsur

chalen bhi le ke jo qindil-e-KHun kahan jaen

kahan zamin se milta hai aasman 'salam'

nazar-fareb ufuq ke fusun kahan jaen