na hum kisi ke liye hain na tum kisi ke liye

na ham kisī ke liye haiñ na tum kisī ke liye

bane haiñ donoñ mohabbat kī zindagī ke liye

ḳhudā-e-ishq karam ho ki dam nikaltā hai

butān-e-dīda-o-dil kuchh to āzarī ke liye

sahar se shaam talak aql ke dhuñdalke meñ

bhaTakte phirte haiñ ham dil kī raushnī ke liye

vufūr-e-shauq-e-takallum se chup hue the kabhī

taras rahe haiñ usī din se ḳhāmushī ke liye

mire savāl-e-tamannā pe hañs ke chup rahnā

ye dil lagī ke liye thā ki dil-lagī ke liye

hamāre jazb-e-nazar kī karāhateñ dekheñ

yahāñ tum aa.e the bas ek do ghaḌī ke liye

ye dard-e-dil to baḌe kaam kī hai chiiz ai dost

magar hai shart ki kaam aa.e aadmī ke liye

na thā ye ilm ki hañsne meñ jaan jaatī hai

kalī shagufta huī thī us āgahī ke liye

mire sarishk-e-tabassum kā raaz kyā samjho

ye dil-lagī ke liye hai na be-dilī ke liye

na dekho tuur kī jānib hazar karo 'naqvī'

ma.āl-e-jur.at-e-mūsā hai raushnī ke liye

na hum kisi ke liye hain na tum kisi ke liye

bane hain donon mohabbat ki zindagi ke liye

KHuda-e-ishq karam ho ki dam nikalta hai

butan-e-dida-o-dil kuchh to aazari ke liye

sahar se sham talak aql ke dhundalke mein

bhaTakte phirte hain hum dil ki raushni ke liye

wufur-e-shauq-e-takallum se chup hue the kabhi

taras rahe hain usi din se KHamushi ke liye

mere sawal-e-tamanna pe hans ke chup rahna

ye dil lagi ke liye tha ki dil-lagi ke liye

hamare jazb-e-nazar ki karahaten dekhen

yahan tum aae the bas ek do ghaDi ke liye

ye dard-e-dil to baDe kaam ki hai chiz ai dost

magar hai shart ki kaam aae aadmi ke liye

na tha ye ilm ki hansne mein jaan jati hai

kali shagufta hui thi us aagahi ke liye

mere sarishk-e-tabassum ka raaz kya samjho

ye dil-lagi ke liye hai na be-dili ke liye

na dekho tur ki jaanib hazar karo 'naqwi'

maal-e-jurat-e-musa hai raushni ke liye