na ham-safir na hamdam dikhai deta hai

na ham-safīr na hamdam dikhā.ī detā hai

bahut ḳhushī meñ bahut kam dikhā.ī detā hai

ye ġham nahīñ ki hameñ kam dikhā.ī detā hai

dikhā.ī deñge hameñ ham dikhā.ī detā hai

salīb-o-dār kā aalam dikhā.ī detā hai

kahīñ ziyāda kahīñ kam dikhā.ī detā hai

na sirf āb-e-baqā sam dikhā.ī detā hai

masīh-e-pāk bhī ab yam dikhā.ī detā hai

dikhā.ī de bhī to aise meñ kyā dikhā.ī de

zamāna darham-o-barham dikhā.ī detā hai

bahar-nigāh do-ālam dikhā.ī dete haiñ

kabhī-kabhār vo aalam dikhā.ī detā hai

guzar rahī hai shab-e-ġham ḳhayāl kī lau meñ

yahī charāġh-e-shab-e-ġham dikhā.ī detā hai

vo lam-yazal kisī dushman ko bhī ye din na dikhā.e

hilāl maz.har-e-mātam dikhā.ī detā hai

ye baat dād-talab hai shikast khā kar bhī

ġhanīm aaj munazzam dikhā.ī detā hai

zamāna kal bhī yahī aa.ina dikhā.egā

ki dekhte hī raheñ ham dikhā.ī detā hai

tujhe vazīfe se fursat nahīñ zarā vaa.iz

mujhe farīza muqaddam dikhā.ī detā hai

tahassurāna nigāhoñ se dekhne vaale

yahāñ koī ḳhush-o-ḳhurram dikhā.ī detā hai

qafas se aa to gayā bāhar aaj sher magar

na valvala na vo dam-ḳham dikhā.ī detā hai

haram meñ dair meñ dargāh meñ kalīsā meñ

jahāñ-tahāñ but-e-ādam dikhā.ī detā hai

ye apne apne nazariye kī baat hai 'sarshār'

vo ajnabī hameñ hamdam dikhā.ī detā hai

na ham-safir na hamdam dikhai deta hai

bahut KHushi mein bahut kam dikhai deta hai

ye gham nahin ki hamein kam dikhai deta hai

dikhai denge hamein hum dikhai deta hai

salib-o-dar ka aalam dikhai deta hai

kahin ziyaada kahin kam dikhai deta hai

na sirf aab-e-baqa sam dikhai deta hai

masih-e-pak bhi ab yam dikhai deta hai

dikhai de bhi to aise mein kya dikhai de

zamana darham-o-barham dikhai deta hai

bahar-nigah do-alam dikhai dete hain

kabhi-kabhaar wo aalam dikhai deta hai

guzar rahi hai shab-e-gham KHayal ki lau mein

yahi charagh-e-shab-e-gham dikhai deta hai

wo lam-yazal kisi dushman ko bhi ye din na dikhae

hilal mazhar-e-matam dikhai deta hai

ye baat dad-talab hai shikast kha kar bhi

ghanim aaj munazzam dikhai deta hai

zamana kal bhi yahi aaina dikhaega

ki dekhte hi rahen hum dikhai deta hai

tujhe wazife se fursat nahin zara waiz

mujhe fariza muqaddam dikhai deta hai

tahassurana nigahon se dekhne wale

yahan koi KHush-o-KHurram dikhai deta hai

qafas se aa to gaya bahar aaj sher magar

na walwala na wo dam-KHam dikhai deta hai

haram mein dair mein dargah mein kalisa mein

jahan-tahan but-e-adam dikhai deta hai

ye apne apne nazariye ki baat hai 'sarshaar'

wo ajnabi hamein hamdam dikhai deta hai