na humse puchhiye aaKHir safar se kya kama lae

na ham se pūchhiye āḳhir safar se kyā kamā laa.e

ġhanīmat ye rahī tūfāñ se bas kashtī bachā laa.e

guzāre haiñ jo din ham ne tumheñ mahsūs tab hoñge

tumhārī bhī kabhī vo zindagī meñ din ḳhudā laa.e

tumhārī bazm meñ jā kar hameñ tohfa milā hai ye

bahut sī tohmateñ be-dāġh dāman pe lagā laa.e

na mausam hī munāsib thā na māñjhī hī salīqe kā

nadī ham paar kyā karte qadam vāpas baḌhā laa.e

babūloñ ke kaTīle jangaloñ meñ yuuñ safar guzrā

badan sab ho gayā ghāyal magar pagḌī bachā laa.e

na hum se puchhiye aaKHir safar se kya kama lae

ghanimat ye rahi tufan se bas kashti bacha lae

guzare hain jo din hum ne tumhein mahsus tab honge

tumhaari bhi kabhi wo zindagi mein din KHuda lae

tumhaari bazm mein ja kar hamein tohfa mila hai ye

bahut si tohmaten be-dagh daman pe laga lae

na mausam hi munasib tha na manjhi hi saliqe ka

nadi hum par kya karte qadam wapas baDha lae

babulon ke kaTile jangalon mein yun safar guzra

badan sab ho gaya ghayal magar pagDi bacha lae