na harf-e-shauq na tarz-e-bayan se aati hai

na harf-e-shauq na tarz-e-bayāñ se aatī hai

supurdagī kī sadā jism-o-jāñ se aatī hai

koī sitāra rag-o-pai meñ hai samāyā huā

mujhe ḳhud apnī ḳhabar āsmāñ se aatī hai

kisī dukān se miltī nahīñ hai garmī-e-shauq

ye aañch vo hai jo soz-e-nihāñ se aatī hai

khulā nahīñ hai vo mujh par kisī bhī pahlū se

nahīñ kī guuñj abhī us kī haañ se aatī hai

ajiib shai hai nashāt-e-yaqīñ kī daulat bhī

kisī vajūd ke vahm-o-gumāñ se aatī hai

parinde shaam Dhale raah meñ nahīñ rukte

koī naved unheñ āshiyāñ se aatī hai

miThās gholtā hai kaun mere lahje meñ

mire suḳhan meñ halāvat kahāñ se aatī hai

gurez bhī kahīñ iz.hār-e-ārzū hī na ho

kashish ye kaisī badan kī kamāñ se aatī hai

kisī hijāb kī bandish ko māntī hī nahīñ

jo mauj ruuh kī jū-e-ravāñ se aatī hai

na harf-e-shauq na tarz-e-bayan se aati hai

supurdagi ki sada jism-o-jaan se aati hai

koi sitara rag-o-pai mein hai samaya hua

mujhe KHud apni KHabar aasman se aati hai

kisi dukan se milti nahin hai garmi-e-shauq

ye aanch wo hai jo soz-e-nihan se aati hai

khula nahin hai wo mujh par kisi bhi pahlu se

nahin ki gunj abhi us ki han se aati hai

ajib shai hai nashat-e-yaqin ki daulat bhi

kisi wajud ke wahm-o-guman se aati hai

parinde sham Dhale rah mein nahin rukte

koi nawed unhen aashiyan se aati hai

miThas gholta hai kaun mere lahje mein

mere suKHan mein halawat kahan se aati hai

gurez bhi kahin izhaar-e-arzu hi na ho

kashish ye kaisi badan ki kaman se aati hai

kisi hijab ki bandish ko manti hi nahin

jo mauj ruh ki ju-e-rawan se aati hai