na hasin misl-e-gulab hun na kisi ki aankh ka KHwab hun

na hasīn misl-e-gulāb huuñ na kisī kī aañkh kā ḳhvāb huuñ

tirī zindagī kī kitāb kā magar ek chhoTā sā baab huuñ

mire harf harf meñ nudrateñ mire baab baab meñ hairateñ

kabhī tū ne jis ko chhuā nahīñ maiñ vo ek korī kitāb huuñ

mirī apnī shakl nahīñ koī tū ne jaise Dhālā maiñ Dhal ga.ī

hai ye faisla tire haath meñ maiñ 'azāb huuñ yā savāb huuñ

tire zauq-e-mai ke shabāb ko nayā chāhiye koī ab nasha

nasha jis kā utre na der tak vahī maiñ purānī sharāb huuñ

ye jahān bahr hai be-karāñ mirī haisiyat hī bhalā hai kyā

mirā naam kyā mirī zaat kyā maiñ to sirf misl-e-habāb huuñ

jo sharīk-e-jurm thā ham-navā vo to jaane kab se rihā huā

huā mājrā mire saath kyā maiñ abhī bhī zer-e-'itāb huuñ

na hasin misl-e-gulab hun na kisi ki aankh ka KHwab hun

teri zindagi ki kitab ka magar ek chhoTa sa bab hun

mere harf harf mein nudraten mere bab bab mein hairaten

kabhi tu ne jis ko chhua nahin main wo ek kori kitab hun

meri apni shakl nahin koi tu ne jaise Dhaala main Dhal gai

hai ye faisla tere hath mein main 'azab hun ya sawab hun

tere zauq-e-mai ke shabab ko naya chahiye koi ab nasha

nasha jis ka utre na der tak wahi main purani sharab hun

ye jahan bahr hai be-karan meri haisiyat hi bhala hai kya

mera nam kya meri zat kya main to sirf misl-e-habab hun

jo sharik-e-jurm tha ham-nawa wo to jaane kab se riha hua

hua majra mere sath kya main abhi bhi zer-e-'itab hun