na ho dil-shikasta koi wo nizam chahte hain

na ho dil-shikasta koī vo nizām chāhte haiñ

na.ī sub.h chāhte haiñ na.ī shaam chāhte haiñ

jo nigāh-e-muztarib ko kahīñ aur kā na rakkhe

vahī barq vo hī jalva sar-e-bām chāhte haiñ

vo jo barguzīda bande haiñ jahān-e-āb-o-gil meñ

na numūd chāhte haiñ na vo naam chāhte haiñ

na ġharaz hai but-kade se na haram se un ko matlab

tire dar ke sāmne hī jo qiyām chāhte haiñ

tirī chashm-e-mast se hai jinheñ nisbat-e-ḳhusūsī

na vo baada chāhte haiñ na vo jaam chāhte haiñ

vo navā-e-sarmadī ho ki sadā-e-qum-bi-iznī

jo naved-e-zindagī de vo payām chāhte haiñ

jise mehr-o-māh dekheñ ba-nigāh-e-rashk 'mūsā'

rah-e-āshiqī meñ ham to vo maqām chāhte haiñ

na ho dil-shikasta koi wo nizam chahte hain

nai subh chahte hain nai sham chahte hain

jo nigah-e-muztarib ko kahin aur ka na rakkhe

wahi barq wo hi jalwa sar-e-baam chahte hain

wo jo barguzida bande hain jahan-e-ab-o-gil mein

na numud chahte hain na wo nam chahte hain

na gharaz hai but-kade se na haram se un ko matlab

tere dar ke samne hi jo qiyam chahte hain

teri chashm-e-mast se hai jinhen nisbat-e-KHususi

na wo baada chahte hain na wo jam chahte hain

wo nawa-e-sarmadi ho ki sada-e-qum-bi-izni

jo nawed-e-zindagi de wo payam chahte hain

jise mehr-o-mah dekhen ba-nigah-e-rashk 'musa'

rah-e-ashiqi mein hum to wo maqam chahte hain