na ho jis ko kisi ka gham use kahiye to kya kahiye

na ho jis ko kisī kā ġham use kahiye to kyā kahiye

jo sun kar haal ho barham use kahiye to kyā kahiye

sabab hove to kiije tark kahiye be-sabab yaaro

ḳhafā hotā ho jo har dam use kahiye to kyā kahiye

bhalī kar ke kaheñ us se to vo maane burā ulTā

jo shīrīnī ko samjhe sam use kahiye to kyā kahiye

nashe meñ raat din maḳhmūr rahtā hai vo ġhairoñ meñ

hai us kā aur hī aalam use kahiye to kyā kahiye

mazā kahne kā ye hai ik kahe aur dūsrā maane

jo ho har baat meñ barham use kahiye to kyā kahiye

samajh achchhe bure kī ho to kuchh kahnā bhī lāzim hai

ho yaksāñ jis kī madh-o-zam use kahiye to kyā kahiye

zabānī haal qāsid se bhalā ham 'aish' kyā kahte

jo hove shaḳhs-e-nā-mahram use kahiye to kyā kahiye

na ho jis ko kisi ka gham use kahiye to kya kahiye

jo sun kar haal ho barham use kahiye to kya kahiye

sabab howe to kije tark kahiye be-sabab yaro

KHafa hota ho jo har dam use kahiye to kya kahiye

bhali kar ke kahen us se to wo mane bura ulTa

jo shirini ko samjhe sam use kahiye to kya kahiye

nashe mein raat din maKHmur rahta hai wo ghairon mein

hai us ka aur hi aalam use kahiye to kya kahiye

maza kahne ka ye hai ek kahe aur dusra mane

jo ho har baat mein barham use kahiye to kya kahiye

samajh achchhe bure ki ho to kuchh kahna bhi lazim hai

ho yaksan jis ki madh-o-zam use kahiye to kya kahiye

zabani haal qasid se bhala hum 'aish' kya kahte

jo howe shaKHs-e-na-mahram use kahiye to kya kahiye