na ho jis pe bharosa us se hum yari nahin rakhte

na ho jis pe bharosa us se ham yaarī nahīñ rakhte

ham apne āshiyāñ ke paas chiñgārī nahīñ rakhte

faqat nām-e-mohabbat par hukūmat kar nahīñ sakte

jo dushman se kabhī laḌne kī tayyārī nahīñ rakhte

ḳharīdāroñ meñ rah kar zindagī vo bik bhī jaate haiñ

tire bāzār meñ jo log hushyārī nahīñ rakhte

banāo ghar na miTTī ke lab-e-sāhil ai nādānoñ

samundar to kināroñ se vafādārī nahīñ rakhte

anā ko saḳhtī-e-hālāt aksar toḌ detī hai

isī Dar se kabhī fitrat meñ ḳhuddārī nahīñ rakhte

dar-o-dīvār se un ke bhalā kyā aa.egī ḳhushbū

jo ghar ke sahn meñ phūloñ kī ik kyārī nahīñ rakhte

faqat lafzoñ se ham 'dānā' hunar kī daad lete haiñ

qalam vaale kabhī shauq-e-adākārī nahīñ rakhte

na ho jis pe bharosa us se hum yari nahin rakhte

hum apne aashiyan ke pas chingari nahin rakhte

faqat nam-e-mohabbat par hukumat kar nahin sakte

jo dushman se kabhi laDne ki tayyari nahin rakhte

KHaridaron mein rah kar zindagi wo bik bhi jate hain

tere bazar mein jo log hushyari nahin rakhte

banao ghar na miTTi ke lab-e-sahil ai nadanon

samundar to kinaron se wafadari nahin rakhte

ana ko saKHti-e-haalat aksar toD deti hai

isi Dar se kabhi fitrat mein KHuddari nahin rakhte

dar-o-diwar se un ke bhala kya aaegi KHushbu

jo ghar ke sahn mein phulon ki ek kyari nahin rakhte

faqat lafzon se hum 'dana' hunar ki dad lete hain

qalam wale kabhi shauq-e-adakari nahin rakhte