na ho nahin hai agar us ka shin qaf durust

na ho nahīñ hai agar us kā shiin qaaf durust

vo haq pe hai to nahīñ is se iḳhtilāf durust

ta'alluqāt kī tajdīd ke liye yaaro

hai apnī apnī kamī kā ye e'tirāf durust

azaab jhāñk rahā hai zarā to fikr karo

nahīñ hai ghar ke kivāḌoñ meñ ye shigāf durust

ye raushnī to matā.a-e-nazar kī dushman hai

mirī nazar meñ hai ab is se inhirāf durust

zarā tum apnī hadoñ kā bhī jā.eza le lo

ye māntā huuñ ki hai mujh se iḳhtilāf durust

ye justujū to kisī saa.e kā ta.āqub hai

huā hai mujh pe achānak ye inkishāf durust

milegā kyā tujhe 'anvar-shamīm’ baaz aa jā

nahīñ hai is dar-e-daulat kā ye tavāf durust

na ho nahin hai agar us ka shin qaf durust

wo haq pe hai to nahin is se iKHtilaf durust

ta'alluqat ki tajdid ke liye yaro

hai apni apni kami ka ye e'tiraf durust

azab jhank raha hai zara to fikr karo

nahin hai ghar ke kiwaDon mein ye shigaf durust

ye raushni to mataa-e-nazar ki dushman hai

meri nazar mein hai ab is se inhiraf durust

zara tum apni hadon ka bhi jaeza le lo

ye manta hun ki hai mujh se iKHtilaf durust

ye justuju to kisi sae ka taaqub hai

hua hai mujh pe achanak ye inkishaf durust

milega kya tujhe 'anwar-shamim’ baz aa ja

nahin hai is dar-e-daulat ka ye tawaf durust