na hote shad aain-e-gulistan dekhne wale

na hote shaad ā.īn-e-gulistāñ dekhne vaale

fasāna bhī agar paḌh lete unvāñ dekhne vaale

halākat-ḳhez ījādoñ pe duniyā faḳhr kartī hai

kahāñ haiñ irtiqā-e-nau-e-insāñ dekhne vaale

jo mumkin ho tum apne haath kī rekhā khurach Daalo

ki ham haiñ to sahī ḳhvāb-e-pareshāñ dekhne vaale

ye raḳhne haiñ ye dar haiñ ye tire ajdād ke sar haiñ

idhar aa katba-e-dīvār-e-zindāñ dekhne vaale

tulū-e-āftāb-e-āgahī kyā ḳhaak dekheñge

hiqārat se mirā chāk-e-garebāñ dekhne vaale

to phir kaisī nazar-bandī tilsimāt-e-tadabbur kyā

jo ḳhud ko dekh leñ jashn-e-charāġhāñ dekhne vaale

shikast-e-zauq-e-nazzāra muqaddar hī sahī 'ġhausī'

unheñ dekheñge phir bhī tā-ba-imkāñ dekhne vaale

na hote shad aain-e-gulistan dekhne wale

fasana bhi agar paDh lete unwan dekhne wale

halakat-KHez ijadon pe duniya faKHr karti hai

kahan hain irtiqa-e-nau-e-insan dekhne wale

jo mumkin ho tum apne hath ki rekha khurach Dalo

ki hum hain to sahi KHwab-e-pareshan dekhne wale

ye raKHne hain ye dar hain ye tere ajdad ke sar hain

idhar aa katba-e-diwar-e-zindan dekhne wale

tulu-e-aftab-e-agahi kya KHak dekhenge

hiqarat se mera chaak-e-gareban dekhne wale

to phir kaisi nazar-bandi tilsimat-e-tadabbur kya

jo KHud ko dekh len jashn-e-charaghan dekhne wale

shikast-e-zauq-e-nazzara muqaddar hi sahi 'ghausi'

unhen dekhenge phir bhi ta-ba-imkan dekhne wale