na ja yun ruTh kar dilbar zara ruk ja zara ruk ja

na jā yuuñ ruuTh kar dilbar zarā ruk jā zarā ruk jā

mirī qismat ke saudā-gar zarā ruk jā zarā ruk jā

mirī har saañs aahū kī tarah mujh se gurezāñ hai

nahīñ suntī kahā aksar zarā ruk jā zarā ruk jā

bhaTaktā hī gayā vo to havas kī be-karānī meñ

pukārā laakh ai rahbar zarā ruk jā zarā ruk jā

na lauT ai yād-e-rafta mere armānoñ kī nagrī meñ

lage maazī se mujh ko Dar zarā ruk jā zarā ruk jā

baḌā nāzuk hai ai makkhī magar makḌe kā jaalā hai

nahīñ ye reshmī bistar zarā ruk jā zarā ruk jā

bigaḌtā khel hai bantā nahīñ ye jald-bāzī se

yahī kahte haiñ dānish-var zarā ruk jā zarā ruk jā

thamā hargiz na tūfān-e-ġham-e-furqat kahā garche

ba-nām-e-allah-u-akbar zarā ruk jā zarā ruk jā

hilāl-e-īd jab dekhā use ruḳhsat kī tab sūjhī

kahā maiñ ne ḳhudā se Dar zarā ruk jā zarā ruk jā

vo aane ko haiñ malak-ul-maut aahā tujh ko kyā ujlat

ḳhudārā yuuñ na jaldī kar zarā ruk jā zarā ruk jā

mujhe lutf-e-tajassus meñ haiñ bhaa.e jab se vīrāne

kahe vo lauT aa ab ghar zarā ruk jā zarā ruk jā

ḳhayāl-e-ābrū hai maiñ tumheñ kab tak manā.ūñgā

kahūñgā maiñ na ab ham-sar zarā ruk jā zarā ruk jā

sunī us ne na rahmāñ kī na shaitāñ kī na yazdāñ kī

kahā sab ne use 'anvar' zarā ruk jā zarā ruk jā

na ja yun ruTh kar dilbar zara ruk ja zara ruk ja

meri qismat ke sauda-gar zara ruk ja zara ruk ja

meri har sans aahu ki tarah mujh se gurezan hai

nahin sunti kaha aksar zara ruk ja zara ruk ja

bhaTakta hi gaya wo to hawas ki be-karani mein

pukara lakh ai rahbar zara ruk ja zara ruk ja

na lauT ai yaad-e-rafta mere armanon ki nagri mein

lage mazi se mujh ko Dar zara ruk ja zara ruk ja

baDa nazuk hai ai makkhi magar makDe ka jala hai

nahin ye reshmi bistar zara ruk ja zara ruk ja

bigaDta khel hai banta nahin ye jald-bazi se

yahi kahte hain danish-war zara ruk ja zara ruk ja

thama hargiz na tufan-e-gham-e-furqat kaha garche

ba-nam-e-allah-u-akbar zara ruk ja zara ruk ja

hilal-e-id jab dekha use ruKHsat ki tab sujhi

kaha main ne KHuda se Dar zara ruk ja zara ruk ja

wo aane ko hain malak-ul-maut aaha tujh ko kya ujlat

KHudara yun na jaldi kar zara ruk ja zara ruk ja

mujhe lutf-e-tajassus mein hain bhae jab se virane

kahe wo lauT aa ab ghar zara ruk ja zara ruk ja

KHayal-e-abru hai main tumhein kab tak manaunga

kahunga main na ab ham-sar zara ruk ja zara ruk ja

suni us ne na rahman ki na shaitan ki na yazdan ki

kaha sab ne use 'anwar' zara ruk ja zara ruk ja