na jaane choT kyon dil par lagi hai

na jaane choT kyoñ dil par lagī hai

kalī gulshan meñ jab koī khilī hai

tumhārā naam le kar hañs rahī hai

ye duniyā ab yahāñ tak aa ga.ī hai

jalā hai is tarah kuchh āshiyāna

jahāñ tak dekhtā huuñ raushnī hai

mujhī se merī barbādī ke qisse

ye duniyā haa.e kitnī ajnabī hai

na jaane aur kyā kyā gul khileñge

bahār ab to qafas tak aa ga.ī hai

jiye jis ke liye jaañ us pe de dī

ye hī bas dāstān-e-zindagī hai

mujhe sab jānte pahchānte haiñ

magar tū hai ki ab tak ajnabī hai

talātum se guzar kar jaane vaale

kināre par bhī kashtī Dūbtī hai

jise sab dushman-e-jāñ kah rahe haiñ

'tabassum' kī usī se dostī hai

na jaane choT kyon dil par lagi hai

kali gulshan mein jab koi khili hai

tumhaara nam le kar hans rahi hai

ye duniya ab yahan tak aa gai hai

jala hai is tarah kuchh aashiyana

jahan tak dekhta hun raushni hai

mujhi se meri barbaadi ke qisse

ye duniya hae kitni ajnabi hai

na jaane aur kya kya gul khilenge

bahaar ab to qafas tak aa gai hai

jiye jis ke liye jaan us pe de di

ye hi bas dastan-e-zindagi hai

mujhe sab jaante pahchante hain

magar tu hai ki ab tak ajnabi hai

talatum se guzar kar jaane wale

kinare par bhi kashti Dubti hai

jise sab dushman-e-jaan kah rahe hain

'tabassum' ki usi se dosti hai