na jaane jae kahan tak ye silsila dil ka

na jaane jaa.e kahāñ tak ye silsila dil kā

vo mil bhī jaa.e to miltā nahīñ sila dil kā

baras rahī thiiñ bahāreñ taras rahī thī zamīñ

safar tamām huā phuul kab khilā dil kā

kahāñ hai vo shah-e-ḳhūbī kahāñ darīcha-e-shab

ga.e vo din ki samā'at meñ thā gila dil kā

vahī ḳharābī-e-jāñ kā sabab bhī hai lekin

qarār-e-jāñ hai ki ye hai mu'āmla dil kā

use fusūñ-gar o be-mehr maiñ nahīñ kahtā

firāq-e-yār kā bā'is hai fāsla dil kā

talāsh usī kī musalsal usī ko pā kar bhī

zamīñ se tā-ba-falak hai ye mashġhala dil kā

kisī tilism-e-hijābāt meñ koī ġham hai

bhaTak rahā hai ḳhayāloñ meñ qāfila dil kā

na jaane jae kahan tak ye silsila dil ka

wo mil bhi jae to milta nahin sila dil ka

baras rahi thin bahaaren taras rahi thi zamin

safar tamam hua phul kab khila dil ka

kahan hai wo shah-e-KHubi kahan daricha-e-shab

gae wo din ki sama'at mein tha gila dil ka

wahi KHarabi-e-jaan ka sabab bhi hai lekin

qarar-e-jaan hai ki ye hai mu'amla dil ka

use fusun-gar o be-mehr main nahin kahta

firaq-e-yar ka ba'is hai fasla dil ka

talash usi ki musalsal usi ko pa kar bhi

zamin se ta-ba-falak hai ye mashghala dil ka

kisi tilism-e-hijabaat mein koi gham hai

bhaTak raha hai KHayalon mein qafila dil ka