na jaane kab se main gard-e-safar ki qaid mein tha

na jaane kab se maiñ gard-e-safar kī qaid meñ thā

ki sañg-e-mīl thā aur rah-guzar kī qaid meñ thā

dikhā.ī detā thā muḳhtār dast-o-bāzū se

magar vo shaḳhs kisī be-hunar kī qaid meñ thā

maiñ ḳhvāb ḳhvāb thā har jashn-e-ārzū kā asiir

khulī jo aañkh to apne hī ghar kī qaid meñ thā

khulī fazā.eñ milīñ jab to ai havā-e-chaman

maiñ be-bazā.atī-e-bāl-o-par kī qaid meñ thā

maiñ ḳhush huuñ yuuñ ki abhī tak tirī nazar meñ nahīñ

vo ashk-e-ḳhūñ jo mirī chashm-e-tar kī qaid meñ thā

na kar sakā kisī manzil kā ehtirām ki maiñ

junūn-e-shauq kā maarā safar kī qaid meñ thā

maiñ uḌ rahā thā fazāoñ kī vus.atoñ meñ magar

mirā vajūd abhī bām-o-dar kī qaid meñ thā

kiyā thā raat tasavvur meñ jis ne qasd-e-farār

vo sub.h pā-ba-girafta sahar kī qaid meñ thā

na jaane kab se main gard-e-safar ki qaid mein tha

ki sang-e-mil tha aur rah-guzar ki qaid mein tha

dikhai deta tha muKHtar dast-o-bazu se

magar wo shaKHs kisi be-hunar ki qaid mein tha

main KHwab KHwab tha har jashn-e-arzu ka asir

khuli jo aankh to apne hi ghar ki qaid mein tha

khuli fazaen milin jab to ai hawa-e-chaman

main be-bazaati-e-baal-o-par ki qaid mein tha

main KHush hun yun ki abhi tak teri nazar mein nahin

wo ashk-e-KHun jo meri chashm-e-tar ki qaid mein tha

na kar saka kisi manzil ka ehtiram ki main

junun-e-shauq ka mara safar ki qaid mein tha

main uD raha tha fazaon ki wusaton mein magar

mera wajud abhi baam-o-dar ki qaid mein tha

kiya tha raat tasawwur mein jis ne qasd-e-farar

wo subh pa-ba-girafta sahar ki qaid mein tha