na jaane kaun hai aur kis ke intizar mein hai

na jaane kaun hai aur kis ke intizār meñ hai

vo ek shaḳhs jo barsoñ se rahguzār meñ hai

kahāñ ye baat tirī fat.h-e-shāndār meñ hai

jo baat dost mirī maslahat kī haar meñ hai

jo dekhūñ jānib-e-gulshan bhī maiñ to kyā dekhūñ

jo tū nahīñ hai to kyā mausam-e-bahār meñ hai

añdhere ho ga.e raushan zabāñ pe aate hī

vo āftāb kī tāsīr zikr-e-yār meñ hai

ye terā vahm ki tū be-sukūñ nahīñ ai dost

sharīk merī taḌap bhī tire qarār meñ hai

baġhair naam liye bhī pukār kar dekhā

kisī kā naam barābar mirī pukār meñ hai

ġham-e-hayāt se raunaq hayāt kī hai 'nasīb'

ki phuul phuul hai jab tak hujūm-e-ḳhār meñ hai

na jaane kaun hai aur kis ke intizar mein hai

wo ek shaKHs jo barson se rahguzar mein hai

kahan ye baat teri fath-e-shandar mein hai

jo baat dost meri maslahat ki haar mein hai

jo dekhun jaanib-e-gulshan bhi main to kya dekhun

jo tu nahin hai to kya mausam-e-bahaar mein hai

andhere ho gae raushan zaban pe aate hi

wo aaftab ki tasir zikr-e-yar mein hai

ye tera wahm ki tu be-sukun nahin ai dost

sharik meri taDap bhi tere qarar mein hai

baghair nam liye bhi pukar kar dekha

kisi ka nam barabar meri pukar mein hai

gham-e-hayat se raunaq hayat ki hai 'nasib'

ki phul phul hai jab tak hujum-e-KHar mein hai