na jaane kaun is dil mein KHiraman hota jata hai

na jaane kaun is dil meñ ḳhirāmāñ hotā jaatā hai

ki sāz-e-dil kā har naġhma pareshāñ hotā jaatā hai

buland itnā mazāq-e-chashm-e-insāñ hotā jaatā hai

jo taarā TuuT jaatā hai rag-e-jāñ hotā jaatā hai

nahīñ qismat meñ shāyad lazzat-e-dard-e-mohabbat bhī

samajhtā huuñ jise maiñ dard darmāñ hotā jaatā hai

haqīqat vo hai jo nazroñ pe zāhir hotī jaatī hai

vo bātil hai ki jo āñkhoñ se pinhāñ hotā jaatā hai

tamanna to tamanna hasrateñ bhī ab nahīñ baaqī

sajāyā thā jo dil maiñ ne vo vīrāñ hotā jaatā hai

mohabbat rang-o-bū ban kar chaman par chhā.ī jaatī hai

har aañsū zīnat-e-jaib-o-garebāñ hotā jaatā hai

chhupā.ūñ kis tarah rāz-e-mohabbat un kī mahfil meñ

agar chup huuñ to āñkhoñ se numāyāñ hotā jaatā hai

mirī tanhā.ī meñ tanhā.iyāñ shāyad nahīñ hotīñ

tasavvur is tarah kuchh jalva-sāmāñ hotā jaatā hai

mohabbat dar-haqīqat 'mauj' be-pāyāñ samundar hai

jise qatra samajhtā thā vo tūfāñ hotā jaatā hai

na jaane kaun is dil mein KHiraman hota jata hai

ki saz-e-dil ka har naghma pareshan hota jata hai

buland itna mazaq-e-chashm-e-insan hota jata hai

jo tara TuT jata hai rag-e-jaan hota jata hai

nahin qismat mein shayad lazzat-e-dard-e-mohabbat bhi

samajhta hun jise main dard darman hota jata hai

haqiqat wo hai jo nazron pe zahir hoti jati hai

wo baatil hai ki jo aankhon se pinhan hota jata hai

tamanna to tamanna hasraten bhi ab nahin baqi

sajaya tha jo dil main ne wo viran hota jata hai

mohabbat rang-o-bu ban kar chaman par chhai jati hai

har aansu zinat-e-jaib-o-gareban hota jata hai

chhupaun kis tarah raaz-e-mohabbat un ki mahfil mein

agar chup hun to aankhon se numayan hota jata hai

meri tanhai mein tanhaiyan shayad nahin hotin

tasawwur is tarah kuchh jalwa-saman hota jata hai

mohabbat dar-haqiqat 'mauj' be-payan samundar hai

jise qatra samajhta tha wo tufan hota jata hai