na jaane kaun sa manzar nazar se guzra tha

na jaane kaun sā manzar nazar se guzrā thā

ki muddatoñ koī sauda-e-sar se guzrā thā

phir is ke ba.ad anā kā shikār ho baiThā

maiñ ek baar tirī rah-guzar se guzrā thā

basī huī hai mahak tere pairahan jaisī

abhī abhī koī jhoñkā udhar se guzrā thā

guzar sakā na tire zabt ke hisār se jo

vo sail-e-ġham bhī mirī chashm-e-tar se guzrā thā

thake thake se vo baazū vo fat.h-mand āñkheñ

safar tavīl koī bāl-o-par se guzrā thā

maiñ naqd-e-jāñ liye baiThā rahā magar 'raunaq'

na jaane dushman-e-jānī kidhar se guzrā thā

na jaane kaun sa manzar nazar se guzra tha

ki muddaton koi sauda-e-sar se guzra tha

phir is ke baad ana ka shikar ho baiTha

main ek bar teri rah-guzar se guzra tha

basi hui hai mahak tere pairahan jaisi

abhi abhi koi jhonka udhar se guzra tha

guzar saka na tere zabt ke hisar se jo

wo sail-e-gham bhi meri chashm-e-tar se guzra tha

thake thake se wo bazu wo fath-mand aankhen

safar tawil koi baal-o-par se guzra tha

main naqd-e-jaan liye baiTha raha magar 'raunaq'

na jaane dushman-e-jaani kidhar se guzra tha