na jaane kaun sa meri taraf saman baqi hai

na jaane kaun sā merī taraf sāmān baaqī hai

ki jaañ de kar bhī mujh par aap kā ehsān baaqī hai

tirī nādāniyoñ se ham mohabbat haar baiThe haiñ

lagāne ko batā ab bhī koī bohtān baaqī hai

mohabbat ke chaman meñ khilne vaale ai gul-e-ḳhanda

tire māthe pe ik bose kā bas armān baaqī hai

kisī sūrat tumhārī diid kī ḳhairāt mil jaa.e

isī ḳhvāhish meñ phailā aaj bhī dāmān baaqī hai

ye ham jo saañs le paate nahīñ haiñ apnī marzī se

hamārī zindagī meñ kaun sā tāvān baaqī hai

koī bhī phuul ḳhvāhish kā mujhe ḳhushbū nahīñ detā

to phir kaise kahūñ maiñ ziist kā gul-dān baaqī hai

ye kis muuzī maraz kī zad meñ aa.ī zindagī 'nāsir'

na koī jānvar baaqī hai na insān baaqī hai

na jaane kaun sa meri taraf saman baqi hai

ki jaan de kar bhi mujh par aap ka ehsan baqi hai

teri nadaniyon se hum mohabbat haar baiThe hain

lagane ko bata ab bhi koi bohtan baqi hai

mohabbat ke chaman mein khilne wale ai gul-e-KHanda

tere mathe pe ek bose ka bas arman baqi hai

kisi surat tumhaari did ki KHairaat mil jae

isi KHwahish mein phaila aaj bhi daman baqi hai

ye hum jo sans le pate nahin hain apni marzi se

hamari zindagi mein kaun sa tawan baqi hai

koi bhi phul KHwahish ka mujhe KHushbu nahin deta

to phir kaise kahun main zist ka gul-dan baqi hai

ye kis muzi maraz ki zad mein aai zindagi 'nasir'

na koi jaanwar baqi hai na insan baqi hai