na jaane kitne fishaar jhele wafa mein parwaz-e-jaan se pahle

na jaane kitne fishār jhele vafā meñ parvāz-e-jāñ se pahle

ḳhudā kā qaa.il thā maiñ na hamdam azāb-e-ishq-e-butāñ se pahle

sabab yahī thā ki chaar tinke mirī umīdoñ kā gulsitāñ the

huī thī barq-o-sharar kī yūrish chaman meñ kab āshiyāñ se pahle

na sochā samjhā na dekhā bhālā hai kaun mushtāq kaun pyāsā

unhoñ ne taqsīm kī hai mai kī jahāñ se chāhā vahāñ se pahle

ye ham ne sochā thā haal apnā kabhī na un se bayāñ kareñge

magar pahuñchte hī chashm-e-tar ne sunā diyā sab zabāñ se pahle

udaas kaliyāñ fasurda ġhunche shikasta shāḳheñ ḳhamosh bulbul

kahāñ thī gulshan meñ dilkashī ye varūd-e-fasl-e-ḳhizāñ se pahle

sitam-kashoñ se kisī ne pūchhā sabab jo tārāji-e-chaman kā

uḌā ke ḳhaak āshiyāñ ke bole uThā thā sho.ala yahāñ se pahle

ye shauq-e-manzil kā thā karishma usī ne tāb-o-tavāñ atā kī

kahāñ to the kārvāñ ke pīchhe pahuñch ga.e kārvāñ se pahle

kahāñ kī manzil kahāñ kā jaada ye sab fareb-e-nazar thā 'nātiq'

khulīñ jo āñkheñ usī jagah the qadam uThā thā jahāñ se pahle

na jaane kitne fishaar jhele wafa mein parwaz-e-jaan se pahle

KHuda ka qail tha main na hamdam azab-e-ishq-e-butan se pahle

sabab yahi tha ki chaar tinke meri umidon ka gulsitan the

hui thi barq-o-sharar ki yurish chaman mein kab aashiyan se pahle

na socha samjha na dekha bhaala hai kaun mushtaq kaun pyasa

unhon ne taqsim ki hai mai ki jahan se chaha wahan se pahle

ye hum ne socha tha haal apna kabhi na un se bayan karenge

magar pahunchte hi chashm-e-tar ne suna diya sab zaban se pahle

udas kaliyan fasurda ghunche shikasta shaKHen KHamosh bulbul

kahan thi gulshan mein dilkashi ye warud-e-fasl-e-KHizan se pahle

sitam-kashon se kisi ne puchha sabab jo taraji-e-chaman ka

uDa ke KHak aashiyan ke bole uTha tha shoala yahan se pahle

ye shauq-e-manzil ka tha karishma usi ne tab-o-tawan ata ki

kahan to the karwan ke pichhe pahunch gae karwan se pahle

kahan ki manzil kahan ka jada ye sab fareb-e-nazar tha 'natiq'

khulin jo aankhen usi jagah the qadam uTha tha jahan se pahle