na jaane kyon wahi jina haram karte hain

na jaane kyoñ vahī jiinā harām karte haiñ

ki jin kā dil se bahut ehtirām karte haiñ

tumhārā zikr kisī baat meñ agar aa.e

ham haath joḌ ke qissa tamām karte haiñ

hameñ hai is liye urdu zabān se ulfat

ham is zabān meñ rab se kalām karte haiñ

hamārā martaba sahrā-e-ishq meñ ye hai

janāb-e-qais bhī jhuk kar salām karte haiñ

ka.ī haiñ log jo jiite haiñ kaam kī ḳhātir

ka.ī haiñ log jo jiine ko kaam karte haiñ

ḳhudā gavāh hai pastī meñ rahne vāloñ par

baḌā hī zulm ye ālī-maqām karte haiñ

'razā' vo ġham bhī hameñ Thiik se nahīñ detā

ham apnī saarī ḳhushī jis ke naam karte haiñ

na jaane kyon wahi jina haram karte hain

ki jin ka dil se bahut ehtiram karte hain

tumhaara zikr kisi baat mein agar aae

hum hath joD ke qissa tamam karte hain

hamein hai is liye urdu zaban se ulfat

hum is zaban mein rab se kalam karte hain

hamara martaba sahra-e-ishq mein ye hai

janab-e-qais bhi jhuk kar salam karte hain

kai hain log jo jite hain kaam ki KHatir

kai hain log jo jine ko kaam karte hain

KHuda gawah hai pasti mein rahne walon par

baDa hi zulm ye aali-maqam karte hain

'raza' wo gham bhi hamein Thik se nahin deta

hum apni sari KHushi jis ke nam karte hain