na jaane wade ka kyon eatibar ab bhi hai

na jaane va.ade kā kyoñ e.atibār ab bhī hai

guzar ga.ī hai shab aur intizār ab bhī hai

kaho to kahne ko kah deñ ki shaad hai duniyā

jo be-qarār thā vo be-qarār ab bhī hai

ġharaz ke dost the jitne vo uTh ga.e lekin

tumhāre dar pe yahī jāñ-nisār ab bhī hai

ḳhizāñ hai yā koī rūThī huī bahār hai ye

nahīñ jo gul to gulistāñ meñ ḳhaar ab bhī hai

idhar to jāma-darī kar rahe haiñ dīvāne

udhar vo kahte haiñ dāman meñ taar ab bhī hai

hamārī ḳhaak abhī tak hai kū-e-jānāñ meñ

mazār go nahīñ lekin ġhubār ab bhī hai

ḳhizāñ ḳhizāñ hai bahāroñ meñ bhī sukūn nahīñ

jo ḳhaar thā mire dil meñ vo ḳhaar ab bhī hai

bahār jaate hī go sab badal ga.e naqshe

mirī nazar meñ vo jān-e-bahār ab bhī hai

ye kah rahe haiñ zamāne ke dekhne vaale

diloñ meñ jaisā thā pahle ġhubār ab bhī hai

badal gayā ho zamāna hameñ nahīñ ma.alūm

vo thā shi.ār jo apnā shi.ār ab bhī hai

na jaane wade ka kyon eatibar ab bhi hai

guzar gai hai shab aur intizar ab bhi hai

kaho to kahne ko kah den ki shad hai duniya

jo be-qarar tha wo be-qarar ab bhi hai

gharaz ke dost the jitne wo uTh gae lekin

tumhaare dar pe yahi jaan-nisar ab bhi hai

KHizan hai ya koi ruThi hui bahaar hai ye

nahin jo gul to gulistan mein KHar ab bhi hai

idhar to jama-dari kar rahe hain diwane

udhar wo kahte hain daman mein tar ab bhi hai

hamari KHak abhi tak hai ku-e-jaanan mein

mazar go nahin lekin ghubar ab bhi hai

KHizan KHizan hai bahaaron mein bhi sukun nahin

jo KHar tha mere dil mein wo KHar ab bhi hai

bahaar jate hi go sab badal gae naqshe

meri nazar mein wo jaan-e-bahaar ab bhi hai

ye kah rahe hain zamane ke dekhne wale

dilon mein jaisa tha pahle ghubar ab bhi hai

badal gaya ho zamana hamein nahin malum

wo tha shiar jo apna shiar ab bhi hai