na kaam fikr se nikla na chal saki tadbir

na kaam fikr se niklā na chal sakī tadbīr

kisī tarah se na badlī phirī huī taqdīr

zamīr-e-dahr se andesha-e-ḳhizāñ na gayā

bahār meñ bhī zamāna hai dard kī tasvīr

ta.ayyunāt meñ uljhī huī hai fikr-e-hayāt

mire zavāl kī tamhīd hai mirī ta.amīr

ab e'tirāf-e-ḳhatā par na is nigāh se dekh

ki ho na jaa.e kahīñ mujh se phir koī taqsīr

zabān-e-ām meñ kahte haiñ kā.enāt jise

haqīqat-e-ġham-e-dil kī hai muḳhtasar tafsīr

nahīñ ḳhudā kī zamīñ tañg ai chaman vaalo

kareñge aur kahīñ ham ab āshiyāñ ta.amīr

zamāna 'hosh' badalne ko hai na.ī karvaT

bujhe paḌe haiñ bahut din se qalb-o-rūh-o-zamīr

na kaam fikr se nikla na chal saki tadbir

kisi tarah se na badli phiri hui taqdir

zamir-e-dahr se andesha-e-KHizan na gaya

bahaar mein bhi zamana hai dard ki taswir

tayyunat mein uljhi hui hai fikr-e-hayat

mere zawal ki tamhid hai meri tamir

ab e'tiraf-e-KHata par na is nigah se dekh

ki ho na jae kahin mujh se phir koi taqsir

zaban-e-am mein kahte hain kaenat jise

haqiqat-e-gham-e-dil ki hai muKHtasar tafsir

nahin KHuda ki zamin tang ai chaman walo

karenge aur kahin hum ab aashiyan tamir

zamana 'hosh' badalne ko hai nai karwaT

bujhe paDe hain bahut din se qalb-o-ruh-o-zamir