na Khaali zehn yun duniya ka rah jae

na ḳhālī zehn yuuñ duniyā kā rah jaa.e

ki saarā kaam naqsh-e-pā kā rah jaa.e

zamīnoñ par na yuuñ qabza kareñ shahr

koī to rāsta sahrā kā rah jaa.e

mire baare meñ lahreñ kuchh bhī socheñ

maiñ kahtā huuñ bharam dariyā kā rah jaa.e

jo rāh-e-jāñ meñ zāhir naqsh-e-jāñ ho

safar aadhā safar-paimā kā rah jaa.e

numūd-e-zaḳhm kam aur ye tamannā

qafas ho kar qafas-ārā kā rah jaa.e

alag hī us kā naġhma hai shajar par

qayām us tā.ir-e-tanhā kā rah jaa.e

na KHali zehn yun duniya ka rah jae

ki sara kaam naqsh-e-pa ka rah jae

zaminon par na yun qabza karen shahr

koi to rasta sahra ka rah jae

mere bare mein lahren kuchh bhi sochen

main kahta hun bharam dariya ka rah jae

jo rah-e-jaan mein zahir naqsh-e-jaan ho

safar aadha safar-paima ka rah jae

numud-e-zaKHm kam aur ye tamanna

qafas ho kar qafas-ara ka rah jae

alag hi us ka naghma hai shajar par

qayam us tair-e-tanha ka rah jae