na KHanqahon ke sae na taj-o-taKHt mujhe

na ḳhānqāhoñ ke saa.e na tāj-o-taḳht mujhe

atā huā hai faqat dhuup kā daraḳht mujhe

vo sang-dil pa mulā.em sā hai dam-e-guftār

maiñ narm-dil huuñ pa lahja milā karaḳht mujhe

tamām umr kī mehnat pe pher de paanī

dikhā.e aañkh jab apne jigar kā laḳht mujhe

mire nasīb kī tārīkiyoñ se kam vāqif

samajh rahī hai ye duniyā sitāra-baḳht mujhe

qadam qadam pe hai yāroñ ko sīm-o-zar kī talāsh

duā buzurgoñ kī apne safar kā raḳht mujhe

harī-bharī hai bahut fasl-e-fikr-o-fan merī

ye aur baat zamīneñ milī haiñ saḳht mujhe

na KHanqahon ke sae na taj-o-taKHt mujhe

ata hua hai faqat dhup ka daraKHt mujhe

wo sang-dil pa mulaem sa hai dam-e-guftar

main narm-dil hun pa lahja mila karaKHt mujhe

tamam umr ki mehnat pe pher de pani

dikhae aankh jab apne jigar ka laKHt mujhe

mere nasib ki tarikiyon se kam waqif

samajh rahi hai ye duniya sitara-baKHt mujhe

qadam qadam pe hai yaron ko sim-o-zar ki talash

dua buzurgon ki apne safar ka raKHt mujhe

hari-bhari hai bahut fasl-e-fikr-o-fan meri

ye aur baat zaminen mili hain saKHt mujhe