na KHarab hota main dhup mein na andheri raat mein ghumta

na ḳharāb hotā maiñ dhuup meñ na añdherī raat meñ ghūmtā

tū jo saath hotā to aur hī kisī kā.enāt meñ ghūmtā

tire zard ḳhitte meñ ḳhaak uḌāne se vaqt miltā agar kabhī

to maiñ zindagī tire sabz-posh ilāqa-jāt meñ ghūmtā

ye hijāb haTtā nigāh se ye ġhubār chhaTtā jo raah se

maiñ tirī nishāniyāñ dekhtā maiñ ajā.ibāt meñ ghūmtā

kahīñ rang dekhtā nau-ba-nau kahīñ jazb kartā mahak tirī

kabhī sair kartā sifāt meñ kabhī terī zaat meñ ghūmtā

yahī fitrat apnī jamāliyāt ke raaz aañkh pe kholtī

agar aadmī kabhī manzaroñ ke taġhayyurāt meñ ghūmtā

vo to yuuñ huā ki ḳhumār-e-rang chhalak paḌā mirī aañkh se

mirā sar vagarna jo ghūmtā to chaman bhī saath meñ ghūmtā

kahīñ aks chūmtā chāñd kā kahīñ jhūmtā kisī lahr par

maiñ ubharte Dūbte kā.enātī tanāzurāt meñ ghūmtā

kabhī jā nikaltā maiñ dhuup meñ kabhī chāñdnī ke sarūp meñ

tire gird ghūmtī raushnī ke talāzumāt meñ ghūmtā

maiñ isī liye to bachā huā thā ġhubār-e-gardish-e-vaqt se

vo jahāñ ghumātā maiñ bas vahīñ kī jamāliyāt meñ ghūmtā

na yahāñ tulū-o-ġhurūb hai na koī shumāl-o-junūb hai

ye maiñ kis taraf nikal aayā huuñ tire shash-jahāt meñ ghūmtā

mirā dil to shams-e-abad ke gird tavāf kartī zamīn hai

ye koī globe to hai nahīñ jo tumhāre haath meñ ghūmtā

ka.ī 'shāhid' aur bhī mintaqe haiñ makāñ zamāñ se juḌe hue

mujhe raah miltī to maiñ vahāñ ke tahayyurāt meñ ghūmtā

na KHarab hota main dhup mein na andheri raat mein ghumta

tu jo sath hota to aur hi kisi kaenat mein ghumta

tere zard KHitte mein KHak uDane se waqt milta agar kabhi

to main zindagi tere sabz-posh ilaqa-jat mein ghumta

ye hijab haTta nigah se ye ghubar chhaTta jo rah se

main teri nishaniyan dekhta main ajaibaat mein ghumta

kahin rang dekhta nau-ba-nau kahin jazb karta mahak teri

kabhi sair karta sifat mein kabhi teri zat mein ghumta

yahi fitrat apni jamaliyat ke raaz aankh pe kholti

agar aadmi kabhi manzaron ke taghayyuraat mein ghumta

wo to yun hua ki KHumar-e-rang chhalak paDa meri aankh se

mera sar wagarna jo ghumta to chaman bhi sath mein ghumta

kahin aks chumta chand ka kahin jhumta kisi lahr par

main ubharte Dubte kaenati tanazuraat mein ghumta

kabhi ja nikalta main dhup mein kabhi chandni ke sarup mein

tere gird ghumti raushni ke talazumat mein ghumta

main isi liye to bacha hua tha ghubar-e-gardish-e-waqt se

wo jahan ghumata main bas wahin ki jamaliyat mein ghumta

na yahan tulu-o-ghurub hai na koi shumal-o-junub hai

ye main kis taraf nikal aaya hun tere shash-jahat mein ghumta

mera dil to shams-e-abad ke gird tawaf karti zamin hai

ye koi globe to hai nahin jo tumhaare hath mein ghumta

kai 'shahid' aur bhi mintaqe hain makan zaman se juDe hue

mujhe rah milti to main wahan ke tahayyuraat mein ghumta