na ki jafaon mein usne koi kasar phir bhi

na kī jafāoñ meñ us ne koī kasar phir bhī

lage hue the umīdoñ ko merī par phir bhī

tumhārī yaad se vābasta hai hayāt mirī

kisī kā yuuñ to huā kaun umr bhar phir bhī

tum apne gird fasīleñ banā ke baiThe ho

huā to hogā mirī yaad kā guzar phir bhī

charāġh āñkhoñ ke vīrān hote jaate haiñ

tumhārī raah se uThtī nahīñ nazar phir bhī

tamām ruup liye chāñdnī chalī aa.ī

hamārā dil rahā tārīk ek ghar phir bhī

na raushnī hai koī aur na rāste ma.alūm

chale haiñ aaj tire saath be-ḳhatar phir bhī

tamām umr diyā maiñ ne apnā ḳhūn-e-jigar

milā na mujh ko koī sāya-e-shajar phir bhī

bahut thī chaah dil-e-nā-tavāñ ruk jaa.e

tavīl hotā gayā umr kā safar phir bhī

na ki jafaon mein us ne koi kasar phir bhi

lage hue the umidon ko meri par phir bhi

tumhaari yaad se wabasta hai hayat meri

kisi ka yun to hua kaun umr bhar phir bhi

tum apne gird fasilen bana ke baiThe ho

hua to hoga meri yaad ka guzar phir bhi

charagh aankhon ke viran hote jate hain

tumhaari rah se uThti nahin nazar phir bhi

tamam rup liye chandni chali aai

hamara dil raha tarik ek ghar phir bhi

na raushni hai koi aur na raste malum

chale hain aaj tere sath be-KHatar phir bhi

tamam umr diya main ne apna KHun-e-jigar

mila na mujh ko koi saya-e-shajar phir bhi

bahut thi chah dil-e-na-tawan ruk jae

tawil hota gaya umr ka safar phir bhi