na koi baat kahni hai na koi kaam karna hai

na koī baat kahnī hai na koī kaam karnā hai

aur us ke baad kaafī der tak ārām karnā hai

is āġhāz-e-mohabbat hī meñ puure ho ga.e ham to

ise ab aur kyā sharminda-e-anjām karnā hai

bahut be-sūd hai lekin abhī kuchh aur din mujh ko

savād-e-sub.h meñ rah kar shumār-e-shām karnā hai

nishāñ denā hai maiñ ne kuchh ġhubār-ālūd samtoñ kā

koī kaafī purānā raaz tasht-az-bām karnā hai

badī ke taur par karnī hai nekī bhī mohabbat meñ

ki jo bhī kaam karnā hai vo be-hañgām karnā hai

abhī to kār-e-ḳhair itnā paḌā hai sāmne mere

abhī to maiñ ne har ḳhaas aadmī ko aam karnā hai

koī badla chukānā hai vafā ke naam par us se

masāfat ke liye uThnā hai aur bisrām karnā hai

kamā.ī umr bhar kī hai yahī ik jā.idād apnī

so ye ḳhvāb-e-tamāshā ab kisī ke naam karnā hai

ik āġhāz-e-safar hai ai 'zafar' ye puḳhta-kārī bhī

abhī to maiñ ne apnī puḳhtagī ko ḳhaam karnā hai

na koi baat kahni hai na koi kaam karna hai

aur us ke baad kafi der tak aaram karna hai

is aaghaz-e-mohabbat hi mein pure ho gae hum to

ise ab aur kya sharminda-e-anjam karna hai

bahut be-sud hai lekin abhi kuchh aur din mujh ko

sawad-e-subh mein rah kar shumar-e-sham karna hai

nishan dena hai main ne kuchh ghubar-alud samton ka

koi kafi purana raaz tasht-az-baam karna hai

badi ke taur par karni hai neki bhi mohabbat mein

ki jo bhi kaam karna hai wo be-hangam karna hai

abhi to kar-e-KHair itna paDa hai samne mere

abhi to main ne har KHas aadmi ko aam karna hai

koi badla chukana hai wafa ke nam par us se

masafat ke liye uThna hai aur bisram karna hai

kamai umr bhar ki hai yahi ek jaidad apni

so ye KHwab-e-tamasha ab kisi ke nam karna hai

ek aaghaz-e-safar hai ai 'zafar' ye puKHta-kari bhi

abhi to main ne apni puKHtagi ko KHam karna hai