na koi dar na daricha magar makan to hai

na koī dar na darīcha magar makān to hai

zamīñ hai zer-e-qadam sar pe āsmān to hai

hazār jalvoñ kā to rāz-dāñ hai ā.īna

huī na aañkh mayassar tujhe zabān to hai

badaltā rahtā hai rang āsmān lamhoñ meñ

sitam-shi.ār abhī mujh se ḳhush-gumān to hai

ġham-e-hayāt se ghabrā ke tajrabe ke liye

chale hī jā.eñge ab dūsrā jahāñ to hai

tamām sahrā-o-dasht-o-jabal kaheñ labbaik

azal se phailī fazāoñ meñ ik azaan to hai

zahe-nasīb jagah thoḌī chashm-e-tar meñ milī

sulagtī dhuup meñ ik sard sā.ebān to hai

mohr-ba-lab huuñ pa shart-e-kalām qaa.em hai

mirī shakeb-e-ayāzī kā imtihān to hai

sa.uud fikr-e-taġhazzul ko bojh hai to rahe

har ek harf haqīqat kā tarjumān to hai

asar ke she'r meñ husn-o-kashīsh kī hai taujīh

na.ī jihat na sahī zeb-e-dāstān to hai

na koi dar na daricha magar makan to hai

zamin hai zer-e-qadam sar pe aasman to hai

hazar jalwon ka to raaz-dan hai aaina

hui na aankh mayassar tujhe zaban to hai

badalta rahta hai rang aasman lamhon mein

sitam-shiar abhi mujh se KHush-guman to hai

gham-e-hayat se ghabra ke tajrabe ke liye

chale hi jaenge ab dusra jahan to hai

tamam sahra-o-dasht-o-jabal kahen labbaik

azal se phaili fazaon mein ek azan to hai

zahe-nasib jagah thoDi chashm-e-tar mein mili

sulagti dhup mein ek sard saeban to hai

mohr-ba-lab hun pa shart-e-kalam qaem hai

meri shakeb-e-ayazi ka imtihan to hai

saud fikr-e-taghazzul ko bojh hai to rahe

har ek harf haqiqat ka tarjuman to hai

asar ke she'r mein husn-o-kashish ki hai taujih

nai jihat na sahi zeb-e-dastan to hai