na koi din na koi raat intizar ki hai

na koī din na koī raat intizār kī hai

ki ye judā.ī bharose kī e'tibār kī hai

jo ḳhaak uḌī hai mire dukh sameT leñge use

jo bichh ga.ī sar-e-manzar vo rahguzār kī hai

vo vasl ho ki khule aa.ine pe aks-e-jamāl

ye aarzū hai magar baat iḳhtiyār kī hai

isī kā naam hai vahshat-sarā-e-jāñ meñ charāġh

usī ke lams meñ dhaḌkan dil-e-figār kī hai

ye kaun thā jo sar-e-bām ḳhud ko bhuul gayā

ye kis kā raqs thaa, gardish ye kis ġhubār kī hai

ye kaun mujh meñ hare mausamoñ utartā hai

ye kaise rañg haiñ ḳhushbū ye kis dayār kī hai

bujhāne vaale ne 'ḳhāvar' bujhā diyā hai charāġh

yahī Thaharne kī saa.at yahī mazār kī hai

na koi din na koi raat intizar ki hai

ki ye judai bharose ki e'tibar ki hai

jo KHak uDi hai mere dukh sameT lenge use

jo bichh gai sar-e-manzar wo rahguzar ki hai

wo wasl ho ki khule aaine pe aks-e-jamal

ye aarzu hai magar baat iKHtiyar ki hai

isi ka nam hai wahshat-sara-e-jaan mein charagh

usi ke lams mein dhaDkan dil-e-figar ki hai

ye kaun tha jo sar-e-baam KHud ko bhul gaya

ye kis ka raqs tha, gardish ye kis ghubar ki hai

ye kaun mujh mein hare mausamon utarta hai

ye kaise rang hain KHushbu ye kis dayar ki hai

bujhane wale ne 'KHawar' bujha diya hai charagh

yahi Thaharne ki saat yahi mazar ki hai