na koi dost ho mera na ho adu mera

na koī dost ho merā na ho adū merā

tum apne muñh se agar kah do mujh ko tū merā

fasurdagī meñ junūn-e-havā-e-gul ya.anī

ḳhizāñ ke daur meñ saudā-e-rang-o-bū merā

jo tum nahīñ to bahār-e-jināñ meñ ḳhaak nahīñ

bahut vasī.a hai dāmān-e-ārzū merā

nibhegī ai dil-e-āvāra ab na tujh se mirī

bas aaj se na maiñ terā huuñ aur na tū merā

banā rahe haiñ vo jalve kī apne tasvīreñ

dikhā dikhā ke tamāshā-e-rang-o-bū merā

kisī kī zulf-e-siyah kah rahī hai khul khul kar

ghaTā ne rang uḌāyā hai hū-ba-hū merā

mah-e-siyām kā aur intizām kyā karte

janāb-e-shaiḳh uḌā le ga.e subū merā

jafā kā rang judā hai vafā kā rang judā

malo na dast-e-hinā.ī meñ tum lahū merā

taḌap rahī hai jo abr-e-siyāh meñ bijlī

firāq meñ yahī naqsha thā hū-ba-hū merā

suhānī raat hai chhiTkī hai chāñdnī 'muztar'

mirī nigāh meñ phirtā hai māh-rū merā

na koi dost ho mera na ho adu mera

tum apne munh se agar kah do mujh ko tu mera

fasurdagi mein junun-e-hawa-e-gul yani

KHizan ke daur mein sauda-e-rang-o-bu mera

jo tum nahin to bahaar-e-jinan mein KHak nahin

bahut wasia hai daman-e-arzu mera

nibhegi ai dil-e-awara ab na tujh se meri

bas aaj se na main tera hun aur na tu mera

bana rahe hain wo jalwe ki apne taswiren

dikha dikha ke tamasha-e-rang-o-bu mera

kisi ki zulf-e-siyah kah rahi hai khul khul kar

ghaTa ne rang uDaya hai hu-ba-hu mera

mah-e-siyam ka aur intizam kya karte

janab-e-shaiKH uDa le gae subu mera

jafa ka rang juda hai wafa ka rang juda

malo na dast-e-hinai mein tum lahu mera

taDap rahi hai jo abr-e-siyah mein bijli

firaq mein yahi naqsha tha hu-ba-hu mera

suhani raat hai chhiTki hai chandni 'muztar'

meri nigah mein phirta hai mah-ru mera