na koi ghair na apna dikhai deta hai

na koī ġhair na apnā dikhā.ī detā hai

har aadmī mujhe tujh sā dikhā.ī detā hai

ravish ravish tire qadmoñ ke naqsh milte haiñ

galī galī tirā chehrā dikhā.ī detā hai

shab-e-firāq kī tārīkiyoñ kā haal na pūchh

charāġh-e-māh bhī andhā dikhā.ī detā hai

ajiib rañg-e-bahārāñ hai ab ke gulshan meñ

na koī phuul na ġhuncha dikhā.ī detā hai

utar ke dekh zarā pyaar ke samundar meñ

ki mauj mauj meñ rasta dikhā.ī detā hai

kahāñ kahāñ pe jalā.ūñ dil-o-nazar ke charāġh

har ek ghar meñ añdherā dikhā.ī detā hai

usī kā zahr hai hāthoñ meñ aaj tak 'iqbāl'

vo ek phuul jo pyārā dikhā.ī detā hai

na koi ghair na apna dikhai deta hai

har aadmi mujhe tujh sa dikhai deta hai

rawish rawish tere qadmon ke naqsh milte hain

gali gali tera chehra dikhai deta hai

shab-e-firaq ki tarikiyon ka haal na puchh

charagh-e-mah bhi andha dikhai deta hai

ajib rang-e-bahaaran hai ab ke gulshan mein

na koi phul na ghuncha dikhai deta hai

utar ke dekh zara pyar ke samundar mein

ki mauj mauj mein rasta dikhai deta hai

kahan kahan pe jalaun dil-o-nazar ke charagh

har ek ghar mein andhera dikhai deta hai

usi ka zahr hai hathon mein aaj tak 'iqbaal'

wo ek phul jo pyara dikhai deta hai