na koi ishq raha aur na mohabbat hai tumhein

na koī ishq rahā aur na mohabbat hai tumheñ

saaf zāhir hai ki ab mujh se adāvat hai tumheñ

mas.ala hal nahīñ hogā kabhī ḳhāmoshī se

lab ko jumbish do agar koī shikāyat hai tumheñ

maiñ tumheñ chhoḌ ke jā.ūñ ye nahīñ ho saktā

tum mujhe chhoḌnā chāho to ijāzat hai tumheñ

muskurāte hue chehre pe udāsī kaisī

kyā mirī jaan mire saath aziyyat hai tumheñ

tum kisī ek ke rahte nahīñ sikke kī tarah

vaqt ke saath badal jaane kī aadat hai tumheñ

yuuñ tamāshā na karo tark-e-ta.alluq kar lo

itnī pyārī agar ajdād kī izzat hai tumheñ

khelte rahte ho ma.asūm diloñ se aksar

khelnā dil se koī shauq nahīñ lat hai tumheñ

zindagī rang se be-rang nazar aa.egī

titliyāñ qaid na karnā ye nasīhat hai tumheñ

mai huī ḳhatm to saaqī ne kahā hazrat-e-qais

ashk pī lījiye gar pyaas kī shiddat hai tumheñ

merī tanhā.ī mujhe dekh ke farmātī hai

mere hote hue aur kis kī zarūrat hai tumheñ

na koi ishq raha aur na mohabbat hai tumhein

saf zahir hai ki ab mujh se adawat hai tumhein

masala hal nahin hoga kabhi KHamoshi se

lab ko jumbish do agar koi shikayat hai tumhein

main tumhein chhoD ke jaun ye nahin ho sakta

tum mujhe chhoDna chaho to ijazat hai tumhein

muskuraate hue chehre pe udasi kaisi

kya meri jaan mere sath aziyyat hai tumhein

tum kisi ek ke rahte nahin sikke ki tarah

waqt ke sath badal jaane ki aadat hai tumhein

yun tamasha na karo tark-e-talluq kar lo

itni pyari agar ajdad ki izzat hai tumhein

khelte rahte ho masum dilon se aksar

khelna dil se koi shauq nahin lat hai tumhein

zindagi rang se be-rang nazar aaegi

titliyan qaid na karna ye nasihat hai tumhein

mai hui KHatm to saqi ne kaha hazrat-e-qais

ashk pi lijiye gar pyas ki shiddat hai tumhein

meri tanhai mujhe dekh ke farmati hai

mere hote hue aur kis ki zarurat hai tumhein