na koi monis-o-hamdam na yar-e-tanhai

na koī monis-o-hamdam na yār-e-tanhā.ī

uThā rahā huuñ akelā maiñ bār-e-tanhā.ī

jahān-e-ishq meñ bikhrā huā paḌā huuñ maiñ

zarā sañbhāl ke guzar ai ġhubār-e-tanhā.ī

mujhe na chheḌ kisī bhiiḌ kī havas huuñ maiñ

mire qarīb na aa ai nigār-e-tanhā.ī

na qaid kar mujhe ai merī zindagī is meñ

banā na yuuñ mire ghar ko mazār-e-tanhā.ī

jise bhī dekhiye mahfil sajā.e baiThā hai

huā huuñ maiñ hī akelā shikār-e-tanhā.ī

maiñ bhaag kar bhī kahāñ jā.ūñ zindagānī se

hai mere chāroñ taraf ḳhār-zār-e-tanhā.ī

makāñ hai shahr meñ kyā jaane kaun kab aa jaa.e

mujhe zarā bhī nahīñ e.atibār-e-tanhā.ī

kahāñ vo mahfileñ vo bhīḌ-bhāḌ yāroñ kī

ki ab to maiñ huuñ 'ḳhalish' aur ġhār-e-tanhā.ī

na koi monis-o-hamdam na yar-e-tanhai

uTha raha hun akela main bar-e-tanhai

jahan-e-ishq mein bikhra hua paDa hun main

zara sanbhaal ke guzar ai ghubar-e-tanhai

mujhe na chheD kisi bhiD ki hawas hun main

mere qarib na aa ai nigar-e-tanhai

na qaid kar mujhe ai meri zindagi is mein

bana na yun mere ghar ko mazar-e-tanhai

jise bhi dekhiye mahfil sajae baiTha hai

hua hun main hi akela shikar-e-tanhai

main bhag kar bhi kahan jaun zindagani se

hai mere chaaron taraf KHar-zar-e-tanhai

makan hai shahr mein kya jaane kaun kab aa jae

mujhe zara bhi nahin eatibar-e-tanhai

kahan wo mahfilen wo bhiD-bhaD yaron ki

ki ab to main hun 'KHalish' aur ghaar-e-tanhai