na kuchh aaghaz hota hai na kuchh anjam hota hai

na kuchh āġhāz hotā hai na kuchh anjām hotā hai

tamāshā-gāh-e-ālam bas ḳhudā kā naam hotā hai

ba-nām-e-muḳhtalif daur-e-subū-o-jām hotā hai

ba-zāhir farq-e-rañgīnī-e-sub.h-o-shām hotā hai

mire saaqī kā andāz-e-karam jab aam hotā hai

to har tār-e-nafas husn-e-nazar kā raam hotā hai

har ik ummīd meñ mastūr kuchh paiġhām hotā hai

nazar se dūrī-e-maqsad kā manzil naam hotā hai

bahār-e-mai-kadā jab sāqī-e-gulfām hotā hai

to avval chashm-e-rañgīñ se tulū-e-jām hotā hai

sazā-vār-e-mohabbat kā yahī in.aam hotā hai

nazar kī aag hai dil muft meñ badnām hotā hai

bahar-sūrat agar saudā-e-ulfat ḳhaam hotā hai

natīja dil lagāne kā ġham-o-ālām hotā hai

ba-andāz-e-ḳhudāyāna ba-vasf-e-shān-e-shāhāna

ishāroñ par kisī ke munhasir har kaam hotā hai

na chheḌo yuuñ nigāhoñ meñ nigāheñ Daal kar dil ko

kisī kī be-ḳhudī kā raaz tasht-az-bām hotā hai

tabī.at 'shād' ho to hijr ke rangīn vaqfoñ meñ

tasavvur aap kī sūrat kā mai-āshām hotā hai

na kuchh aaghaz hota hai na kuchh anjam hota hai

tamasha-gah-e-alam bas KHuda ka nam hota hai

ba-nam-e-muKHtalif daur-e-subu-o-jam hota hai

ba-zahir farq-e-rangini-e-subh-o-sham hota hai

mere saqi ka andaz-e-karam jab aam hota hai

to har tar-e-nafas husn-e-nazar ka ram hota hai

har ek ummid mein mastur kuchh paigham hota hai

nazar se duri-e-maqsad ka manzil nam hota hai

bahaar-e-mai-kada jab saqi-e-gulfam hota hai

to awwal chashm-e-rangin se tulu-e-jam hota hai

saza-war-e-mohabbat ka yahi inam hota hai

nazar ki aag hai dil muft mein badnam hota hai

bahar-surat agar sauda-e-ulfat KHam hota hai

natija dil lagane ka gham-o-alam hota hai

ba-andaz-e-KHudayana ba-wasf-e-shan-e-shahana

ishaaron par kisi ke munhasir har kaam hota hai

na chheDo yun nigahon mein nigahen Dal kar dil ko

kisi ki be-KHudi ka raaz tasht-az-baam hota hai

tabiat 'shad' ho to hijr ke rangin waqfon mein

tasawwur aap ki surat ka mai-asham hota hai