na kuchh kahna na sunna barsar-e-paikar ho jaana

na kuchh kahnā na sunñā barsar-e-paikār ho jaanā

qayāmat hai nigāhoñ kā tirī talvār ho jaanā

kaleje kaT ga.e sab dekhne vāloñ ke sīnoñ meñ

kise mā'lūm thā añgḌā.ī kā talvār ho jaanā

tirī tirchhī nazar ne ye hunar bhī ḳhuub sīkhā hai

khiñche to tiir ho jaanā chale talvār ho jaanā

fareb-e-husn kā adnā sā ik ye bhī karishma hai

nazar-andāz ho kar tiir kā talvār ho jaanā

tirī nīchī nazar bhī kyā nazar hai ik qayāmat hai

kabhī nāvak kabhī ḳhanjar kabhī talvār ho jaanā

nirālā hī tarīqa hai hamāre qatl karne kā

kanakhiyoñ se kisī kā dekhnā talvār ho jaanā

kisī kī be-ruḳhī bhī 'nāz' hashr-angez hotī hai

palaTte hī nigāh-e-nāz kā talvār ho jaanā

na kuchh kahna na sunna barsar-e-paikar ho jaana

qayamat hai nigahon ka teri talwar ho jaana

kaleje kaT gae sab dekhne walon ke sinon mein

kise ma'lum tha angDai ka talwar ho jaana

teri tirchhi nazar ne ye hunar bhi KHub sikha hai

khinche to tir ho jaana chale talwar ho jaana

fareb-e-husn ka adna sa ek ye bhi karishma hai

nazar-andaz ho kar tir ka talwar ho jaana

teri nichi nazar bhi kya nazar hai ek qayamat hai

kabhi nawak kabhi KHanjar kabhi talwar ho jaana

nirala hi tariqa hai hamare qatl karne ka

kanakhiyon se kisi ka dekhna talwar ho jaana

kisi ki be-ruKHi bhi 'naz' hashr-angez hoti hai

palaTte hi nigah-e-naz ka talwar ho jaana